ل ژێر چاڤدێریا پ. د. ملصح دهۆكی سەرۆكێ زانكۆیا دهۆك كۆلیژا پەروەردا بنیات/ ئامێدیێ ل رۆژا 25/2/2019 دیدارەكا ئەكادیمی ـ سیاسی بۆ هژمارەكا ئەندامێن سەركردایەتیێن هێز و لایەنێن سیاسی ل كوردستانێ ئەنجام دا.
د دیدارێ دا كو هژمارەكا پەرپرس و ئەندامێن پەرلەمانێ عیراقێ و كوردستانێ پشكدارببون ل دەستپێكێ راگرێ كۆلیژا پەروەردا بنیات/ ئامێدیێ د. كەرەڤان ئامێدی دیاركر كو ئامێدیێ هەر دكەڤن دا پرا ئاڤاكرن و پێكڤە ژیانێ بوویە و هەردەم ب دیدارێن خۆ شیایە ڤالاتیا سیاسی پر بكەت و گۆت ب مەرەما شرۆڤەكرنا رەوشا ئەكادیمی و سیاسی یا كوردستانێ داكو ئێدی حكومەت بهێتە پێكئینان و رەوشا كوردستانێ و عێراقێ ژی بەرەڤ باشتربوونێ ڤە بچیت ئەڤ دیدارە ساز كریە.
سەرۆكێ زانكۆیا دهۆك پ. د. مصلح دهۆكی د پەیڤەكی دا زانكۆ و ناڤەندێن ڤەكۆلینان دڤێت دارێژەر بن بۆ هەمی بریار و سیاسەتان، هەروەسا دەسپێشخەر بن بۆ حكومەت و سازیێن میری ل دانانا پلانێن وان یێن درێژخایەن ل سەر شەنگستەكێ زانستی و ئەكادیمی یێ مكۆم، ئەگەر ئەڤ پێنگاڤە ژلایێ زانكۆیان ڤە هاتە هاڤێتن و پلان و بەرنامێن خۆ ل دۆر هەر پرسەكا هەی پێشكێش كرن، ل وی دەمی حكومەت و لایەنێن سیاسی ژی دێ ملكەچی پێشنیار و دیتنێن ئەكادیمی بن.
ئاما ژە دا وێ چەندێ ژی كو هەتا نوكە ل هەرێما كوردستانێ ئەڤ ناڤەندێن ڤەكۆلینان نەبووینە و ئەگەر هەبن ژی وەكو پێدڤی كار نەكریە، لەورا ل ڤێرێ ژ زانكۆیان دهێتە خواستن ب ڤی ئەركی راببن، چونكو زانكۆ ژ جڤاكینە و دڤێت خزمەتێ پێشكێشی جڤاكی بكەن، جڤاك ب هەمی پێكهاتێن سیاسی و ئاینی و نەتەوەی ڤە پێدڤی ب خزمەتا زانكۆیانە.
پ. د. مصلح دهۆكی هەروەسا گۆت ل زانكۆیا دهۆك هەردەم مە گرنگی دایە بابەتێن گەرمێن روژەڤێ چ ب رێكا كۆر و كۆنفرانسان بیت یان ژی گێرانا دیدار و وورك شۆپا بیت، دانوستاندن ل سەر بابەتان دهێنە كرن و راسپارد و پوختەیا گەنگەشێ دهێتە ئاراستەكرن بۆ جهێن پەیوەندی ب وی بابەتی ڤە هەی، هەروەسا پشتەڤانیا سەرۆكاتیا زانكۆیا دهۆك ژی دیاركر بۆ هەر جۆرە دیدارەكا سیاسی ـ ئەكادیمی ـ زانستی كو ڤەرێژا وێ خزمەت كرن بیت بۆ جڤاكی ب هەمی پێكهاتێن وێ ڤە.
د ڤێ دیدارێ دا دوو پەنەل هاتنە ئەنجام دان پەنەلێ ئیكێ ل دۆر ئەگەرێن گیروبوونا پێكئینانا كابینا نوی یا حكومەتا هەرێما كوردستانێ ب مێڤانداریا دلشاد شهاب ئەندامێ شاندێ دانوستاندن كارێ پارتی و خەلیل ئیبراهیم ئەندامێ ئەنجومەنێ سیاسی یێ یەكگرتوو، پەنەلێ دووێ ژی ل دۆر پەیوەندیێن هەرێمێ و عیراقێ و كاریگەریا پەسەند كرنا بودجێ ل سەر هەرێما كوردستانێ ب مێڤانداریا د. ئەحمەد سەفار سەرۆكێ لژنا دارایی یا پەرلەمانێ عیراقێ و د. ڤیان سەبری سەرۆكا فراكسیونا پارتی ل پەرلەمانێ عیراقێ بوو.