سەنتەرێ ڤەكۆلینێن پەروەردەیی ل زانكۆیا دهۆك وۆركشۆپەك لدۆر گونجانا پرۆگرامێن خواندنێ یێن كولیژا پەروەردا بنیات دگەل پرۆگرامێن خواندنێ ل قۆناغا فێركرنا بنەرەتی ل كەرتێ پەروەردێ، ئەڤرۆ رێکەڤتی ٢/٣/٢٠٢٢ و ل هۆلا پێشمەرگە ل كولیژا پەروەردا بنیات، و ب ئامادەبوونا نوینەرێن کولیژا ناڤبری و هەروەسا یێن رێڤەبەریا گشتی یا پەروەردا دهۆکێ، ئەنجامدا.
ئەڤ وۆركشۆپە ل ژێر ناڤێ (چەندیا وەكهەڤیێ د ناڤبەرا پرۆگرامێن خواندنێ ل پشكێن كولیژا پەروەردا بنیات پشتبەستن لسەر دهێتە كرن بۆ خزمەتا پێدڤیا پرۆگرامێن خواندنێ ل قوتابخانێن قۆناغا فێركرنا بنەرەتی) بوو، و مامۆستایێن پشكێن زانستی یێن كولیژا پەروەردا بنیات دگەل سەرپەرشتیارێن پەروەردەیی لسەر هەشت گرۆپان هاتبوونە بەلاڤكرن لدویڤ بسپۆریا وان، ئەوژی (زمانێ كوردی، زمانێ عەرەبی، زمانێ ئنگلیزی، مێژوو و جیۆگرافیا، ماتماتیك، زانستێن گشتی، پەروەردا تایبەت و رێنمایێن پەروەردەی).
د پەیڤا راگریا كولیژێ دا، كو ژ لایێ د. موئەیەد بەرەكات هاریكارێ راگرێ كولیژا پەروەردا بنیات ڤە هاتە خواندن، ئاماژە ب وێ چەندێ هاتەدان كو فەرە پرۆگرامێن مە یێن خواندنێ وەكهەڤی هەبیت دگەل وی پرۆگرامی یێ ل قوتابخانان دهێتە خواندن.
سەرۆكێ زانكۆیا دهۆك، د. داوود سلێمان ئەترووشی، باس ل گرنگیا پەروەردا بنیات د جڤاکی دا کر و ب تایبەت، رۆلێ وێ د ئاڤاکرنا نفشەکێ هشیار و زانا دا، و د پەیڤا خۆ دا گۆت: "ئێک ژ کارێن مە یێن پێشینەیی ل سەرۆکاتیا زانکۆیا دهۆک، پتر مۆدێرنکرن و پێشڤەبرنا کولیژێن پەروەردا بنیات ل دهۆکێ و ئامێدیێ و هەروەسا کولیژا پەروەرەد-ئاکرێ یە".
د. داوود ئەترووشی هەروەسا دیارکر "ئەم یێ ل ڤێرێ دا خزمەتا پرۆسا پەروەردێ بكەین، ڤەكۆلینان لسەر ئاریشێن وێ ئەنجامبدەین، پێدڤیە بزانین سیاسەتا پەروەردێ یا چاوایە؟ پێدڤیە هەمی هەولا بدەین ڤالاهی د ناڤبەرا زانكۆیێ و پەروەردێ دا کێمتر ببیت و ئەڤ هەماهەنگیە بەردەوام و لسەر ئاست و بوارێن زانستی یێن جودا جودا هەبیت".
سەرۆكێ زانكۆیا دهۆك ئاماژە دا بۆلۆنیا پرۆسێس و گۆت: "بجهئینانا بۆلۆنیا پرۆسێس مەزنترین ریفۆرمە د بیاڤێ خواندنا بلند دا، و كێمترین گرنگی پێ هاتیە دان، لەورا جڤاتا زانكۆیێ بریار دایە كو هەر ٦٧ پشكێن زانستی ل كولیژێن زانكۆیا دهۆك پرۆسێسا بۆلۆنیا بجهبینن"، هەروەسا خویاکر "دەمێ قوتابیێن مە ژ زانکۆیێ دەردچن، خولا بۆ یێن بەری خۆ ڤەکەن، نەکو خول بۆ وان بهێنە ڤەكرن تاکو دهێتە پێگەهاندن".
ژ لایێ خۆ ڤە رێڤەبەرێ گشتی یێ پەروەردا پارێزگەها دهۆكێ، عومەر عەلی تاها د پەیڤەكی دا گۆت: "وەكو پەروەردە دێ مفایەكێ باش ژ ڤان وۆركشۆپان هێتە دیتن، پەروەردا دهۆكێ نوكە ٢٧ هزار مامۆستا هەنە، دگەل دەرچوویەكێ ئاست بلند ژ لایێ زانكۆیێ ڤە دێ كارتێكرنا خۆ یا ئەرێنی لسەر پرۆسێسا خواندنێ هەبیت، چەند نێزیكبوون هەبیت؛ هند دێ خزمەتا پرۆسێسا خواندنێ هێتە كرن، چونكو پرۆسێسەكا بازنەیی یە د ناڤبەرا زانكۆیێ و پەروەردێ دا".
رێڤەبەرێ سەنتەرێ ڤەكۆلینێن پەروەردەیی ل زانكۆیا دهۆك، د. سابر زێباری باس ل ئارمانجێن وۆركشۆپی كر و گۆت: "ئارمانجا وۆركشۆپی ئەوە کو بابەتێن ل پشكێن پەروەردا بنیات و قوتابخانێن پەروەردێ دهێنە خواندن وەكهەڤی هەبیت، د ڤێ وۆركشوپێ دا دێ گەنگەشە لسەر وان بابەتا هێنە كرن ئەوێن ل زانكۆیێ یان پەروەردێ دهێنە زێدە كرن، و هەر گرۆپەك ژ وان هەشت گرۆپان دێ راسپادان پێشکێشکەن بۆ وەكهەڤكرنێ".