هاریكارێ سەرۆكێ زانكۆیێ بۆ كاروبارێن كارگێری و دارایی د. ئەحمەد محەمەد سالح دیاركر كو زانكۆیا دهۆك 41 خانی و 18 شقێن ئاكنجیبوونا مامۆستایان یێن هەین و ل دویف رێنمایان ل سەر مامۆستا دابەش دكەن و هەر مامۆستایەكی مافێ هەیی بۆ ماوێ چار سالان بمینیتە د ڤان ئێكەیێن ئاكنجیبوونێ ڤە.
ل دۆر سیستەمێ مفا وەرگرتنێ ژ ئاكنجیبوونێ دڤان خانی و شقان دا د. ئەحمەد محەمەد سالح دیاركر كو لیستە بناڤێ كۆلیژان بەرهەڤ كرینە و هەر كۆلیژا مامۆستایێن وێ بەهرا خۆ وەرگرت ئەو كۆلیژە ژ لیستێ دهێتە دەرێ، گۆت ژی ژ سەرجەمێ 18 كۆلیژێن زانكۆیا دهۆك مامۆستایێن 14 كۆلیژان ژێ مفا داربووینە و بتنێ چار كۆلیژە ماینە ئەو ژی (پەروەردا جەستەی و زانستێن وەرزشی، زمانان، پەروەردە/ ئاكرێ و پەروەردا بنیات ئامێدیێ).
هاریكارێ سەرۆكێ زانكۆیێ بۆ كاروبارێن كارگێری و دارایی ئەو چەند ژی گۆت كو پشتی خانیەكێ ئاكنجیبوونێ ل گوندێ زانكۆیێ ڤالا بووی، ل رۆژا 19/7/2020 لژنەكا تایبەت هاتە پێكئینان و ب ئامادەبوونا هاریكارێن سەرۆكێ زانكۆیێ بۆ كاروبارێن زانستی و قوتابیان و هەروەسا نوینەرێ مامۆستایان ل جڤاتا زانكۆیێ و نوینەرێن كۆلیژان و نوینەرێ رێڤەبەریا كاروبارێن یاسایی ل سەرۆكاتیا زانكۆیا دهۆك تێروپشك هاتنە كیشان و خانی بۆ كۆلیژا زمانان دەركەت، دیار ژی كر كو هەر كۆلیژەكا بۆ دەردكەڤیت ئەو كۆلیژە ل دویف رێنمایان د دەتە وی مامۆستایی ئەوێ خالێن وی ژ هەمیان پتر.
د. ئەحمەد محەمەد سالح هەروەسا گۆت بەری مامۆستا بچیتە د ڤان خانی و شقا دا سوزنامەكی دادگریت كو هەر دەمێ ماوێ ئاكنجیبوونا وی ب دووماهی هات دەربكەڤیت، داكو هندەك مامۆستایێن دیتر ل جهێ وان ئاكنجی ببن.