ب مەرەما دروستکرنا پەیوەندیێن ئەکادیمی د ناڤبەرا زانکۆیا دهۆک و زانکۆیێن هندستانێ دا، ئەڤرۆ رێکەڤتی ٨/٦/٢٠٢٢ و ل سەنتەرێ رەوشەنبیری و جڤاکیێ زانکۆیا دهۆک، سەرۆکێ زانکۆیا دهۆک د. داود سلێمان ئەتروشی کۆمبوونەک دگەل (سوبهاش کێین)، قونسولێ گشتیێ هندستانێ ل هەولێرێ ئەنجامدا و د کۆمبوونێ هژمارەکا دەلیڤەیێن هەماهەنگی و هەڤکاریێ هاتنە گەنگەشەکرن.
د ڤێ کۆمبوونێ دا و ب ئامادەبوونا د. لوقمان هادی، هاریکارێ سەرۆکێ زانکۆیێ بۆ کاروبارێن زانستی و د. رەند حەمۆدی، بەرپرسا نڤێسینگەها پەیوەندیێن نیڤدەولەتی ل زانکۆیا دهۆک و شاندێ قونسولیا گشتیا هندستانێ ل هەولێرێ، پشتی گەریانەکێ د ناڤ ئاڤاهیێ سەنتەرێ رەوشەنبیری دا، باس ل دەلیڤەیێن ئەنجامدانا هژمارەکا پرۆژە و بەرنامەیێن هەڤپشک د ناڤبەرا زانکۆیا دهۆک و زانکۆیێن هندستانێ دا هاتەکرن و ئاوایێ دەستپێکرنا ڤان پەیوەندیان و پێشڤەبرن و بەردەوامیدانێ هاتە گەنگەشەکرن.
سەرۆکێ زانکۆیا دهۆک خۆشحالیا خۆ ب ڤان سەرەدان و کۆمبوون و پەیوەندیان دیارکر و گەشبینیا خۆ ژ پاشەرۆژا ڤێ هەماهەنگیێ دەربڕی و لۆگۆیەکێ زانکۆیا دهۆک و وەرگەرا داستانا مەم و زینا خانی ب زمانێ ئینگلیزی پێشکێشی قونسولێ هندستانێ کرن. ژ لایێ خۆ ڤە قونسولێ گشتیێ هندستانێ دلخۆشی و گەشبینیا خۆ دیارکر و ب رژدی باس ل گرنگیا ڤان پەیوەندیان کر و وەرگەرەکا کوردی یا پەرتووکا مهاتما گاندی دگەل هندەک دیاریێن دی پێشکێشی سەرۆکێ زانکۆیا دهۆک کرن.