ل رێکەڤتی ٢١/٥/٢٠٢٢ ل بەغدایا پایتەختێ عیراقێ، هەلبژارتنێن دەستەیا ئێكەتیا وەرزشا زانكۆیێن عیراقێ هاتنە ئەنجامدان و سێ ئەندامێن كورد تێدا هاتنە هەلبژارتن، کو ئێك ژ وان د. فەلاح سەعدوون عومەر، مامۆستایێ كولیژا پەروەردا جەستەیی و زانستێن وەرزشی یە ل زانكۆیا دهۆك.
د. فەلاح سەعدوون لدۆر ڤێ یەکێ دیارکر "مەرەمێن سەرەكی یێن ئێكەتیا وەرزشی یا زانكۆیێن عیراقێ، سەرپەرشتیكرنا وەرزشا زانكۆیێن عیراقێ و كوردستانێ و هەلبژارتنا قارەمانێن وەرزشی یێن سەرانسەری زانكۆیانە، لەورا هەر چوار سالان جارەكێ ئەڤ دەستەیە دهێتە هەلبژارتن بۆ سەرپەرشتیكرنا كار و چالاكیێن وەرزشی یێن سەرجەم زانكۆیا".
د. فەلاح ئەوژی خویاکر "ئەندامێن ڤێ ئێكەتیێ سێ مامۆستایێن كوردن کو ئێك ژ وان مامۆستایەكا ئافرەتە، ئەڤە دەرفەتەكا باشە بۆ زێدەكرنا قارەمانێن كورد، چونكو یاریێن وەرزشی ل عیراقێ و دەرڤەی عیراقێ دهێنە ئەنجامدان، لەورا پێدڤیە ئەم كارەكێ باش ئەنجامبدەین چونكو ئەم ل رێزێن پێشیێینە ل ناڤ كۆمەكا یاریێن وەرزشی، ب تایبەتی لسەر ئاستێ وەرزشا كچان.