كولیژا ئەندازیاری ل زانكۆیا دهۆك چالاكیا رۆژا دیزاینا ئەندازیاری یا نەهێ ئەڤرۆ رێکەڤتی ١٢/٥/٢٠٢٢ ل ئاڤاهیێن كولیژێ ل كەمپا زانكۆیا دهۆك، ب ئامادەبوونا شیرەتكارێ وەزیرێ خاندنا بلند و ڤەكۆلینێن زانستی بۆ كاروبارێن زانستی، جێگرێ پارێزگارێ دهۆك، هاریكارێن سەرۆكێ زانكۆیێ و ئەندامێن جڤاتا زانكۆیێ و هژمارەكا مامۆستا و قوتابیێن كولیژا ئەندازیاری و بسپورێن ڤی بیاڤی ئەنجامدا.
راگرێ كولیژا ئەندازیاری ل زانكۆیا دهۆك د. جێمس حەسەدو هەیدۆ دیاركر "رۆژا دیزاینا ئەندازیاری سالانە دهێتە ئەنجامدان و ئەڤ سالە یا نەهێ یە و پرۆژێن قوتابیان یێن شەش پشكێن كولیژا ئەندازیاری (شارستانی، ژێدەرێن ئاڤێ، تەلارسازی، كارەب و كۆمپیوتەر، میكانیك و رۆپیڤان) هاتنە نیشادان، كو نێزیکی ٥٠٠ قوتابیان تێدا پشكدارن، مەرەم ژێ چێكرنا پەیوەندیایە دناڤبەرا زانكۆیێ و كەرتێ گشتی و تایبەت دا و هندەك ئەندازیار ژ رێڤەبەریان ل ڤێ پێشانگەهێ بەرهەڤ دبن و مفایی ژێ دبینن".
بۆ شێوازێ بجهئینانا پرۆژێن ڤێ رۆژێ دهێنە نیشادان د. جێمس دیارکر "لژنەكا هەلسەنگاندنێ ژ بسپۆرێن ڤی بیاڤی ژ دەرڤەی مامۆستایێن كولیژێ هاتیە پێكئینان بۆ هەلسەنگاندنا پرۆژێن قوتابیان و دیاركرنا پرۆژە و دیزاینێن سەركەڤتی، هەروەسا بۆ بدەستڤەئینانا دەلیڤێن كاری ژی دڤان جۆرە چالاكیان دا پتر رێک بۆ قوتابیان پەیدادبن.
رۆژا دیزاینا ئەندازیاری چالاكیەكا سالانەیە و ل دویماهیا وەرزێ خواندنێ كولیژا ئەندازیاری ل زانكۆیا دهۆك بۆ قوتابیێن خۆ سازدکەت و تێدا پرۆژێن قوتابیان یێن دەرچوونێ دهێنە نیشادان و هەلسەنگاندن و ئەڤ سالە 167 پرۆژە تێدا پشكدار بوون.