ل رۆژا 5/4/2021 سەنتەرێ زانكۆیا دهۆك بۆ پشكنین و ڤەكۆلینێن كۆرۆنایێ و نەخۆشیێن ڤەگر ل سەرۆكاتیا زانكۆیا دهۆك ژلایێ وەزیرێ ساخلەمیێ د. سامان بەرزنجی و وەزیرێ خاندنا بلند و ڤەكۆلینێن زانستی د. ئارام محمد قادر و سەرۆكێ زانكۆیا دهۆك ڤە هاتە ڤەكرن.
وەزیرێ خاندنا بلند و ڤەكۆلینێن زانستی د. ئارام محمد قادر د كۆنفرانسەكێ رۆژنامەڤانی دا گۆت ڤەكرنا ڤی سەنتەری پشكداریەكا گرنگە بۆ كەرتێ ساخلەمی یێ ڤێ دەڤەرێ كو هەر ژ دەستپێكا پەیدابوونا ڤی ڤایرۆسی خاندنا بلند رۆلەكێ باش هەبوویە و ب هەماهەنگی دگەل وەزارەتا ساخلەمی ئەڤ خزمەتە پێشكێشی وەلاتیان هاتینە كرن.
وەزیرێ ساخلەمیێ د. سامان بەرزنجی دەستخۆشی ل زانكۆیا دهۆك كر و سوپاسیا وەزیرێ خاندنا بلند كر و رۆلێ وەزارەتا خاندنا بلند گرنگ هەلسەنگاند و گۆت مە كارێ هەڤپشك گەلەكێ زوورە ب تایبەت د بیاڤێ ساخلەمی دا.
د. جاسم محمد عەبدو مامۆستایێ زانكۆیا دهۆك و سەپەرشتێ تاقیگەهێن كۆرۆنایێ ل پارێزگەها دهۆكێ دیاركر كو كارێ ڤی سەنتەری ئەنجامدانا ڤەكۆلینایە ل دۆر كەیسێن كۆرۆنایێ و ئەو ڤاكسینێن دهێنە دانان، ئەڤ سەنتەرە دێ ژلایێ بۆردەكێ مامۆستایێن بسپۆر ڤە هێتە برێڤەبرن، هەروەسا گۆت قوتابیێن ماستەر و دكتۆرایێ ژی ڤەكۆلینێن خۆ یێن دڤی بیاڤی دا دێ ل ڤی سەنتەری ئەنجام دەن.
دڤێ سەرەدانا خۆدا بۆ زانكۆیا دهۆك وەزیرێ خاندنا بلند و ڤەكۆلینێن زانستی سەرەدانا یەكە و بەشێن كارگێری یێن زانكۆیا دهۆك كر و ژ نێزیك ل دۆر ب رێڤەچوونا كاری ل زانكۆیێ ئاگەهدار بوو.