ئەڤرۆ رۆژا پێنجشەمبی، رێکەڤتی ٢٠/١/٢٠٢٢، جڤاتا زانکۆیا دهۆک کۆمبوونەک لدۆر بەرهنگاریکرنا کۆرۆنایێ گرێدا. د ڤێ کۆمبوونێ دا دانوستاندنێن درێژ لدۆر بژاردەیێن جودایێن بەرهنگاریکرنا ڤایرۆسێ کۆرۆنا و رێگرتنا بەلاڤبوونا وێ ل زانکۆیا دهۆک هاتنەکرن.
بریار هاتەدان کو هەر ژ رۆژا ئێکشەمبیا بهێت، رێکەڤتی ٢٣/١/٢٠٢٢، رێ ب هیچ کەسەکی ناهێتەدان کو بێی ماسک بهێتە د ناڤ زانکۆیێ و هۆلێن وێ یێن خواندنێ دا. واتە پێدڤیە لسەر هەمی قوتابی و مامۆستا و فەرمانبەران، ب بەردەوامی ماسکان بکاربینن و هەمی رێنماییێن خۆپاراستنێ بجهبینن.
هەژی ئاماژێپێکرنێیە کو پێشوەخت زانکۆیا دهۆکێ بریاردایە کو ژ سەرێ مەها شوباتا داهاتی، نابیت هیچ مامۆستا و فەرمانبەرەک بێی کارتا ڤاکسیندانانێ بهێتە د ناڤ زانکۆیێ دا، ئەوێن کو ئاریشەیێن جەستەیی دگەل ڤاکسیندانانێ هەین ژی، پیدڤیە پشکنینا کۆرۆنایێ ئەنجامبدەن و راپۆرتەکێ ژ لیژنا بلندا بەرهنگاریکرنا ڤایرۆسێ کۆرۆنایێ ل زانکۆیا دهۆک دروستبکەن.
سەرەرای هندێ کو ئەڤرۆ بێهنڤەدانا فەرمی بوو، لێ ژبەر رژدیا بابەتی و خۆئامادەکرن بۆ بجهئینانەکا رژدا رێنماییێن خۆپاراستنێ ژ ڤایرۆسێ کۆرۆنا، جڤاتا زانکۆیا دهۆک ئەڤ کۆمبوونە ئەنجامدا وژبلێ بابەتێ بەربەلاڤبوونا داویێ یا ڤایرۆسێ کۆرۆنا، هندەک بابەتێن دییێن گرێدای زانکۆیێ هاتنە گەنگەشەکرن و کۆمبوونێ بۆ ماوێ سێ دەمژمێر و نیڤا ڤەکێشا.