ل رۆوژا 8/3/2021 ل هۆلا كۆنفرانسان ل زانكۆیا دهۆك كۆربەندێ جیهانی بێ سنور ئافرەت د وارێ زاستی دا هاتە رێكخستن كو ئەڤە بۆ جارا ئێكێ یە ل هەرێما كوردستانێ و عیراقێ ب پشكداریا 30 وەلاتان ل سەرانسەری جیهانێ هێتە گێران و بۆ ماوێ سێ رۆژان دێ یا بەردەوام بیت.
سەرۆكێ زانكۆیا دهۆك پ. د. مصلح دهۆكی د پەیڤەكی دا ئاماژە دا ڤان جۆرە چالاكیان و گرنگیا وان بۆ زانكۆیا دهۆك و جڤاكی ب گشتی و بەرهەڤیا زانكۆیا دهۆك ژی بۆ هەر جۆرە چالاكیەكی دیاركر.
هاریكارێ سەرۆكێ زانكۆیێ بۆ كاروبارێن زانستی و خاندنا بلند د. لوقمان هادی سەروكێ ڤی كۆربەندی دیاركر كو ئەڤ كۆربەندە بۆ جارا ئێكێ یە ل هەرێما كوردستانێ و عیراقێ دهێتە گێران و دەستنیشان كرنا زانكۆیا دهۆك ژ بۆ گێرانا ڤی كۆربەندی ژبەركو باژێرێ دهۆكێ هژمارەكا زوور یا ئاوارە و پەرنابەران حەواندینە لەورا ئەڤە زوورا گرنگ بوو بۆ باژێرێ دهۆكێ و زانكۆیا دهۆك ژبەر چالاكێن وێ دبوارێن پەیوەندیێن نێڤدەولەتی دا، گۆت ژی ئەڤ كۆربەندە هەر سال ل وەلاتەكی دهێتە كرن.
ئەو ژی گۆت كو د كۆربەندی دا ڤەكۆلەرێن 30 وەلاتان ل سەرانسەری جیهانێ ژ هەمی كیشوەران تێدا پشكدارن و دێ 110 ڤەكۆلین تێدا هێنە وەرگرتن و هژمارەكا زوورا ئافرەتان تێدا پشكدارن و ژبەر كاودانێن كۆرۆنایێ و ساخلەمیێ و خۆپاراستنێ ئەڤ كۆربەندە دێ ب رێكا ئۆنلاین هێتە كرن، یا پێدڤی بوو ئەڤ كۆربەندە ل سالا بۆری هاتبا ئەنجامدان لێ ژبەر بەلاڤبوونا ڤایروسێ كورۆنایێ هاتە پاشخستن بۆ ئەڤرۆ.
جێگرێ سەرۆكێ كۆربەندی د. مزگین محمد حسن راگرێ كۆلیژا زانستێن مرۆڤایەتی دیاركر كو ئەڤ كۆربەندە د رۆژا جیهانیا ئافرەتان سازكرییە و دێ بۆ ماوێ سێ رۆژان ڤەكێشیت ل دۆر رۆلێ ئافرەتان دبیاڤێ زانستی دا كو ب هەڤكاریە دناڤبەرا كۆلیژا زانستێن مرۆڤایەتی ل زانكۆیا دهۆك دگەل كۆربەندێ جیهانی یێ ئافرەتان ب سەرپەرشتیا د. ئەمەل ئەمین، گۆت ژی مە ڤیایە ل ڤی كۆربەندی رۆلێ ئافرەتێ دیار بكەین دهەمی بوارێن زاستی دا كو ئافرەت دشێت هەمی كارێن زاستی ئەنجام بدەت.
ئاشكرا ژی كر كو ب رێكا كۆربەندی مە دڤێت ئاریشێن جڤاكێ خۆ چارەسەربكەین ب رێكا هەمی پشكێن زاستی یێن كۆلێژا مە ژ ئاشتی مافێ مرۆڤ و كۆمەلایەتی و دەروونناسی و ژینگەهێ و جۆگرافیێ، دگەل خاندنێن ئاشتیێ یێن پشكداری ئاڤاكرنا د كۆمەلگەهێ دا بكەین، كو پشتی هاتنا داعش ئەم بووینە پەناگەهەك و باژێرەك كو پتری خەلكێ وێ ئاوارە و پەنابەر حەواندین.