د چارچۆڤێ کۆنگرێ (١٤)ـێ یێ پارتی دیمۆکراتی کوردستان ل دهۆکێ، ل رێکەڤتی ٢٠٢٢/١١/٤، د. عسمەت محەمەد خالد، دامەزرێنەر و ئێکەم سەرۆکێ زانکۆیا دهۆک، ژ لایێ رێزدار سەرۆک مەسعوود بارزانی ڤە ب میدالیا بارزانیێ نەمر هاتە خەلاتکرن.
ب ڤێ هەلکەڤتێ، سەرۆکێ زانکۆیا دهۆک د. داود سلێمان ئەتروشی، ب رێکا پەیوەندیەکا تێلەفۆنی پیرۆزباهی ل رێزدار د. عسمەت محەمەد خالد، دامەزرێنەر و ئێکەم سەرۆکێ زانکۆیا دهۆک کر.
سەرۆک مەسعوود بارزانی ل دەمی پێشکێشکرنا میدالیا بارزانیێ نەمر بۆ د. عسمەت محەمەد خالدی، باس ل چیرۆکا دامەزراندنا زانکۆیا دهۆک کر و راگەهاند "ئەڤرۆ زانکۆیا دهۆک ئێکە ژ باشترین زانکۆیان."
ژ لایێ خۆ ڤە، د. داود سلێمان ئەتروشی، سەرۆکێ زانکۆیا دهۆک، ل دۆر خەلاتکرنا د. عسمەت محەمەد خالدی ب میدالیا بارزانیێ نەمر، راگەهاند: "ب هەلکەڤتا وەرگرتنا بەرزترین میدالیا رێزگرتنێ، میدالیا بارزانیێ نەمر، ب ناڤێ سەرۆکاتیا زانکۆیا دهۆک گەرمترین پیرۆزباهی ئاراستەی برایێ خۆ د. عسمەت محەمەد خالد دکەین. بۆ مە جهێ شانازیێ یە کو کەسایەتیەکێ وەکو د. عسمەتی، کو زانکۆیەکا بناڤودەنگا وەکو زانکۆیا دهۆک دامەزراندی و شیای رووبەرەکێ مەزنێ جهی بۆ تەرخان بکەت، ئەڤ میدالیا مەزن وەرگرتی. ئەم هوسا دبینین کو ئەڤ میدالیە، خەلاتکرنەکە بۆ هەمی کادرێن زانکۆیا دهۆک ئاڤاکری و پێشڤەبری و پێشڤەدبەن. سوپاس بۆ جەنابێ سەرۆک بارزانی کو ب ڤی شێوەیێ ژ هەژی رێز ل ئێکەمین سەرۆکێ زانکۆیا دهۆک گرتی و بەردەوام پشتەڤان بوویە د هەمی قۆناغێن ئاڤاکرنا زانکۆیا دهۆک دا." سەرۆکێ زانکۆیێ هەروەسا راگەهاند: "ئەم ل زانکۆیا دهۆک، ب هەمی شیانان دێ هەولدەین وی بناغێ بۆ زانکۆیا دهۆک هاتیە دانان پتر پێشبێخین و زانکۆیێ بەرەڤ ئاسۆیێن بلندتر ببەین."