كۆنفرانسێ‌ زانستی یێ‌ نێڤدەولەتی یێ پشكا جۆگرافی ب شێوێ ئونلاین هاتە ئەنجامدان
Aug. 11, 2021, 2:17 a.m.

ل رۆژا 17/8/2020 كۆنفرانسێ‌ زانستی یێ‌ نێڤدەولەتی یێ پشكا جۆگرافی ل كۆلیژا زانستێن مرۆڤایەتی ل زانكۆیا دهۆك ل دۆر بابەتێ‌ (جۆگرافیا و رۆلێ وێ د چارەسەریا كێشێن سەردەمی دا) ب شێوێ ئونلاین هاتە گێران.
ئەڤ كۆنفرانسە ب چاڤدێریا سەرۆكێ زانكۆیا دهۆك پ. د. مصلح دهۆكی هاتبوو ب رێڤەبرن و ب هەڤكاری دگەل زانكۆیا تەهران و كۆمەلگەها فارابی و زانكویا قم و ئێكەتیا ئەكادیمیێن عەرەب ل یەمەن و دەزگەهێ هودا یێ ڤەكۆلینێن ئستراتیژی هاتە ئەنجامدان.
سەرۆكێ‌ لژنا بەرهەڤكرنا كۆنفرانسی د. ئەحمەد عەلی حەسەن ژپشكا جۆگرافی ل زانكۆیا دهۆك دیاركر كو ژبەر ڤایرۆسێ كورۆنایێ ئەڤ كۆنفرانسە ب شێوێ ئونلاین ب رێڤە چوو و ب سەركەفتیانە هاتە ئەنجامدان، گەلەك ڤەكۆلەران ژ هەمی وەلاتان پشكداری تێداكریە و ڤەكۆلینێن خو پێشكێش كرینە.
سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت جهێ‌ خوشحالیێ‌ یە كو سەرەرایی هەمی وان هەڤركیێن ئەم و جیهان هەمی تێدا دەرباز دبین ئەڤ كۆنفرانسە دهێتە گێران، داخازا سەركەفتنێ‌ ژی بۆ خاست بۆ بجه هاتنا وان ئارمانجێن بۆ هاتینە دانان ژ پێخەمەت چارەسەركرنا بابەتێن سەردەمیانە ب رێكێن ب شێوازێن نوی و ب رێكێن زانستی.
گۆت ژی گۆمان تێدا نینە كو خاندنا بلند كلیلا سەركەفتنا هەر وەلاتەكی یە چ ژلایێ‌ ئابووری و جڤاكی ڤە بیت یان زانستی و تەنانەت یی سیاسی ژی لەورا گرنگی دان ب خاندنا بلند و پێشخستنا وێ‌ یا بەردەوام یا بوویە پێدڤیەك و دشیاندا نینە دەست ژێ‌ بهێنە بەردان.
پ. د. مصلح دهۆكی هەروەسا گۆت زانكۆیا دهۆك هەر ژ دامەزراندنێ‌ گرنگی دایە پێشخستنا جڤاكی و پێگەهاندنا كەسانێن خودان شیان ل هەمی بیاڤان و ب تایبەت وان زانستێن رەنگڤەدانا خو ل كەتواری هەبیت.