هاریكارێ سەرۆكێ زانكۆیا دهۆك بۆ كاربارێن كارگێری و دارایی د. ئەحمەد محەمەد سالح دیار كو ل رۆژێن 27 و 28/1/2021 ل هەولێرا پایتەخت كۆنفرانسەكێ زانستی ل دۆر سێكتەرێ تەندروستی ل كوردستانێ و عیراقێ ل ژێر ناڤێ (كۆپیتكا تەندروستیا كوردستانێ 2021) هاتبوو گێران، ئەو ژی ب نوینەراتیا زانكۆیا دهۆك و وەكو راگرێ كۆلیژا پزیشكی ب وەكالەت پشكداری د ڤی كۆنفرانسی دا كربوو.
د. ئەحمەد محەمەد سالح ئاشكرا كر كو ئەڤ كۆنفرانسە تایبەت هاتبوو دانان بۆ چاوانایا رێكخستا دابەشكرنا ڤاكسینێ كۆرۆنایێ ئەگەر بەغدا بەهرا كوردستانێ فرێكر كا دێ ل سەر چ بنەما هێتە دابەشكرن بۆ تەخ و چینێنن كوردستانێ و كا كیژ تەمەن دێ وەرگرن و كیژ خەلك دێ وەرگریت، گۆت ژی رێكەفتن ل سەر وێ چەندێ هاتیە كرن كو نوكە لژنەكا بلند هاتیە دانان ل سەرانسەری عیراقێ، كوردستان ژی ئەندامە تێدا كو چەند دكتورێن تایبەتمەند ئەندامن د وێ لژنا بلند دا ئەو یێ كاری ل سەر دكەن كا دێ چ پلان دانن و چاوا هێتە دابەش كرن، كو دابەش كرن دێ ل سەر بنەمایێ راپۆرت و داتایێن وەزارەتا تەندروستی بیت كا چەند كەس مرینە چەند كەس توش بووینە چ تەمەنن و چ تەخ و چین تووش بووینە د ڤێ نەخۆشیێ دا.
ل دۆر پشكداریا كۆنفرانسی د. ئەحمەد محەمەد سالح گۆت پشكداری ل سەر ئاستەكێ بلند بوو، وەزیرێ ساخلەمی و بریكارێن وەزیران و نوینەرێ وەزارەتا خاندنا بلند و هەمی رێڤەبەرێن گشتی یێن ساخلەمیێ ل كوردستانێ و عیراقێ رێكخراوێن نەحكومی وەكو (WHO) ب تایبەتی ئەو رێكخراوێن ڤی كاری دكەن و بسپۆر ژ دەرڤەی وەلاتی ژی ب شێوێ ئونلاین پشكدار ببوون، كو ل سەر ئاستەكێ بلند هاتبوو رێكخستن.
د. ئەحمەد محەمەد سالح هەروەسا گۆت ئەم وەكو زانكۆیا دهۆك مە پشكداری كر و ب تایبەتی پشكداریا مە یا ئەكتیف بوو د پەنەلەكی دا و دەفەتەكا باش دامە ئەم وەكو زانكۆیا دهۆك باخڤین، مە تەئكید ل سەر وێ چەندێ كر ئەم وەكو وەزارەتا خاندنا بلند و ب رێكا كۆلیژێن پزیشكی ئەم دشێین پشكدار ببینن د ڤێ پرۆسێ دا و هاریكاریا وان بكەین ب رێكا ڤەكۆلینان كو دێ باشترین بنەما دانین بۆ دابەشكرنا ڤێ ڤاكسینی، دیسا بەحس كر كو پسیارا وان ژ مە ئەو بوو كو ئایا هین وەكو زانكۆ و كۆلیژ دێ شێن هاریكاریا ڤێ پرۆسێ كەن و بەرسڤا مە ژی ئەو بوو كو بەلێ مە شیان یێن هەین و زانكۆیا دهۆك و كۆلیژا پزیشكی هەر یا بەردەوام بوویە بۆ كارێن ل دۆر كۆرۆنایێ هاتینە كرن.