رێككەفتنەك ل ناڤبەرا زانكۆیا دهۆك و كۆمپانیا (PMS) یا لوبنانی ل ناڤبەرا راگرێ كۆلیژا كارگێری و ئابووری ل زانكۆیا دهۆك د. رێبەر فەتاح و رێڤەبەرێ كۆمپانیا (PMS) یا لوبنانی رامون ئازار دا ل سەرۆكاتیا زانكۆیا دهۆك ل رۆژا 7/1/2018 هاتە ئیمزا كرن.
د رێورەسمێن ئیمزا كرنێ دا كو هاریكارێ سەرۆكێ زانكۆیێ بۆ كاروبارێن زانستی د. سەباح ئیبراهیم و هەروەسا هاریكارێ سەرۆكێ زانكۆیێ بۆ كاروبارێ كارگێری و دارایی د. حەجی موسا دبەرهەڤبوون د. رێبەر فەتاح دیاركر كو ب ئارمانجا پێشڤەبرنا كەرتێ گەشتوگۆزارێ ل هەرێما كوردستانێ ب گشتی و كۆلیژا كارگێری و ئابووری ل زانكۆیا دهۆك پشكدار بیت د ڤێ پێشخستنێ دا ب رێكا بەرهەم كرنا كادرێ ڤی كەرتی ئەڤ رێككەفتنە ئیمزا كر.
راگرێ كۆلیژا كارگێری و ئابووری ل زانكۆیا دهۆك هەروەسا دیاركر كو د ڤێ رێككەفتنا لێكتێگەهشتنێ دا كۆمپانیا لوبنانی دێ هاریكاریا كۆلیژا كارگێری و ئابووری كەت بۆ پێشخستنا شیانێن قوتابیێن پشكا كارگێری گۆزار و ئوتێلگێری و كۆلیژە كادری پێشكێشی وان بكەت و ب رێكا وان بۆ هەمی كەرتێ گەشتوگۆزاری هەرێما كوردستانێ، هەروەسا گۆت مە دڤیا پتر پشتەڤانیا ڤێ پشكێ بكەین چونكو دەلیڤێن كاری ل كەرتێ گەشتوگۆزارێ ل هەرێما كوردستانێ بەرەف زێدەبوونێ نە، لەوما مە دڤێت وەكو سەنگەكی بدەینە ڤێ پشكێ و پێشكەفتنەكی تێدا پەیدا بكەین و ئەڤ گرێبەستە هاتە ئیمزا كرن.
د. رێبەر فەتاح گۆت ژی ئەڤ گرێبەستە دێ چەند ئارمانجان بجه ئینیت ئەو ژی پێشخستنا شیانێن قوتابیان هەروەسا خزمەتكرنا گەشتوگۆزارێ ل هەرێمێ و هەروەسا دێ خزمەتا زانستێ ژی هێتە كرن ل پشكا كارگێری گۆزار و ئوتێلگێری ل كۆلیژا كارگێری و ئابووری.
ئەو ژی دیاركر كو ژ لایێ پرۆگرامان ڤە دێ سیستەمێن كۆمپیوتەری یێن گەشتوگۆزاری یێن ئەو كۆمپانیا لوبنانی بكاردئینیت دەنە كۆلیژێ و ل لابۆرێن كۆلیژێ بجه ئینن و هاریكاریا پشكا كارگێری گۆزار و ئوتێلگێری ژی كەن بۆ مامۆستا د پراكتیكێ و گۆتنا وانان دا بۆ پێشخستنا شیانێن قوتابیان كو د بەرهەڤ بن ل كاركرنێ ل سەر سیستەمەكێ جیهانی كو هەكە قوتابی ل دویف ڤی سیستەمی دەربچن نە بتنێ ل ئۆتێلێن ب سەر كۆمپانیا وان ڤە بەلكو ل وان ئۆتێلێن ژ دەرڤەی وەلاتی ژی شێن لێ كار كەن وەكو كاردرەكێ جیهانی یێ بەرهەڤ بیت ل هەمی جها كار بكەت، چونكو دەلیڤێن كاری ژی دێ كۆمپانی بۆ پەیدا كەت.