ئەڤرۆ رۆژا سێشەمبی رێكەڤتی 14ـی گولانێ 2024، كۆلیژا ھۆنەرێن جوان ل زانكۆیا دھۆك ئێكەم فەستیڤالا ھۆنەرێن جوان ئەنجام دا، كو دێ بۆ ماوێ سێ رۆژا یا بەردەوام بیت. فەستیڤالا ھۆنەرێن شێوەكاری یاكو ژلایێ كولیژا ھۆنەرێن جوان ڤە ھاتیە ئەنجامدان سەربوورەكا جیاوازە ب ئارمانجا بەرچاڤكرنا كارێن ھۆنەری یێن قوتابی و مامۆستایێن كولیژێ ھاتیە ئەنجامدان.

فەستیڤال ل ھۆلا پەیمانگەھا ھۆنەرێن جوان ھاتە ئەنجامدان و پێشوازی ل مێھڤانا ھاتە كرن، ل دەستپێكێ پەیڤا بخێرھاتنێ بشێوازێ دیالۆگ ژ لایێ ھژمارەكا قوتابی و فەرمانبەرێن كولیژێ ھاتە پێشكێشكرن و جەخت ل سەر گرنگیا دەربرینكرنا ھونەری و داھێنانێ د جڤاكی دا كر، ل دویڤ دا سەرۆكێ زانكۆیا دھۆك، د. داود سلێمان ئەتروشی پەیڤەك پێشكێشكر، د پەیڤا خۆدا تەكەز ل سەر پێگیریا زانكۆیێ د پالپشتیكرنا بەھرەیا و پەرەپێدانا جۆراوجۆریا كەلتووری كر.

ژ دیارترین برگەیێن فەستیڤالێ، نیشاندانا شانوگەریا "جولانك" ژ نڤێسین و دەرھێنانا د. محەمەد سەبری، كو ئەنجامدانا قوتابیا بۆ شانوگەریێ ب شێوەیەكێ جوان بوو جھێ سەرنجا ئامادەبوویا، ئەڤەژی پێگیریا كولیژا ھونەرێن جوان ب جیاوازیێ د ھونەرێ شانویێ دا دكەت.

زێدەباری نیشاندانا شانوگەریێ، ئامادەبوویا گەریانەك د ناڤ پێشانگەھا ھۆنەری دا ئەنجامدا، د پێشانگەھێ دا كومەكا جۆراوجۆر ژ تابلۆیێن شێوەكاری ھاتبوونە نیشاندن، و شیان و داھێنانا شێوەكارێن نوی و جیاواز پێشكێشكر.

ھەژی ئاماژەدانێ یە، كو پیشانگەھا ھونەری دێ ب درێژاھیا ماوێ فەستیڤالێ یا بەردەوام بیت، كو دەلیڤە ب مێھڤانا ھێتە دان بۆ سەرەدانا وێ.

رۆژا ئێكێ ژ فەستیڤالا ھۆنەرێن شێوەكار ب چالاكیێن ھۆنەری یێن ناوازە ب دویماھی ھات، ل رۆژا دووێ یا فەستیڤالێ دێ بۆ گەنگەشێن شرۆڤەكرنا رەخنەیی بۆ بابەتێن پێشكێشكری ژ ئەوان شانوگەریا "جولانك" و كارێن دی یێن ھونەری ھێتە تەرخانكرن.

بۆ داونلۆدکرنا وێنێن ب کوالتیا بلند، ئەڤی لینکێ ل خوارێ کلیک بکە:

https://drive.google.com/drive/folders/14a3DTm41gZ1fi9rW23uD5qY2UuJD11GY?usp=sharing

راگەھاندنا زانكۆیا دھۆك؛ سێشەمب 14ـی گولانێ 2024

عسمەت خابوور و ماهر طاهر كێستەیی

فۆتۆ: محەمەد عەبدولكەریم، عەلی بانكی، ھەرمان جانگیر.