ئەڤرۆ رۆژا سێشەمبی رێكەڤتی 14ـی گولانێ 2024، ب ئامادەبوونا د. داود سلێمان ئەتروشی، سەرۆكێ زانكۆیا دھۆك و عەبدولخالق بابیری، جێگرێ وەزیرێ كاروبارێن پێشمەرگەی و مارك ستروھ، قونسلێ گشتی یێ ویلایەتێن ئێكگرتی یێن ئەمریكا و زاك بازی رێڤەبەرێ رێكخراوا گیانێ ئەمریكا و ئەفسەر و پلەدارێن پێشمەرگەی، زانكۆیا دھۆك دویماھی ب خۆلا زمانێ ئنگلیزی بۆ ئەفسەرێن پێشمەرگەی پشتی چوار ھەیڤا ژ ھەڤكاریا بەردەوام ب دویماھی ئینا. ئەڤ خۆلە ژ لایێ زانكۆیا دھۆك ڤە دھاتە سەرپەرشتیكرن و پشكداریكرنا ب ھەڤكاری ل گەل وەزارەتا كاروبارێن پێشمەرگەی، كو 30 پێشمەرگەیا د ماوێ 7ـی كانوینا دووێ ھەتا 8ـی گولانێ 2024 ڤەكێشا.

سەرۆكێ زانكۆیێ خۆشحالیا خۆ ب ئەڤێ دەستپێشخەریێ دیاركر كو ل گەل ئەركێ جڤاكی یێ سیێ یێ زانكۆیا دھۆك دگونجیت، دیسان دووپاتكر كو زانكۆیا دھۆك تەكەزێ ل سەر دابینكرنا پێدڤیێن جڤاكی دكەت، ھەروەسا سوپاسیا قونسلخانا گشتی یا ویلایەتێن ئێكگرتی یێن ئەمریكی و وەزارەتا كاروبارێن پێشمەرگەی بۆ پالپشتیا وان كر.

دیسان عەبدولخالق بابیری، جێگیرێ وەزیرێ كاروبارێن پێشمەرگەی، سوپاسیا زانكۆیا دھۆك كر بۆ مێھڤانداریا خۆلێ و سوپاسیا قونسلخانا گشتی یا ویلایەتێن ئێكگرتی یێن ئەمریكا و رێكخراوا گیانێ ئەمریكا بۆ پالپشتیكرنا وان كر، ھەروەسا پەیوەندیێن بەردەوام یێن د ناڤبەرا وەزارەتا پێشمەرگەی و ویلایەتێن ئێكگرتی یێن ئەمریكا بەرچاڤكرن.

ھەروەسا قوتابیێن پێشمەرگە "رەمزی حسێن و خانم سیپەل خەلیل" ب نوینەراتیا پێشمەرگێن پشكداری خۆلێ سوپاسیێن خۆ بۆ لایەنێن پشكدار د خۆلێ دا ئاراستەكرن و دەربرین ژ چەوانیا باشتربوونا شیانێن وان د زمانێ ئنگلیزی دا و تێگەھشتنا وان یا رەوشەنبیری كر.

ژ لایێ خۆ ڤە مارك ستروھ، قونسلێ گشتی یێ ویلایەتێن ئێكگرتی یێن ئەمریكا پیروزباھی ل دەرچوویێن خۆلێ كر و ئاماژە ب شیانا خۆلێ ل سەر پەرەپێدانا رەھوانیێن وان و پەیداكرنا دەلیڤێن زێدەتر ژ مەشقدانا لەشكەری ل گەل سوپایێ ئەمریكا دا.

ل دویماھیێ باوەرنامە ل سەر پشكداربوویێن خۆلێ ھاتنە دابەشكرن و رێزگرتن ل محمد یوسف و خانم ھیڤی محەمەد ھاتە گرتن وەك دوو قوتابیێن سەركەڤتی، ھەروەسا دیاریێن ھێمایی ب زانكۆیا دھۆك و رێكخراوا گیانێ ئەمریكا و قونسلخانا گشتی یا ویلایەتێن ئێكگرتی یێن ئەمریكا بۆ پشكداریكرنا وان ھاتنە دان، دیسان رێكخراوا گیانێ ئەمریكا ئەنجامێن خۆلێ یێن پێشمەرگە خەلاتكرن.

ھەژی ئاماژەدانێ یە، 30 پێشمەرگە ژ 143 پێشكێشكەران، ژ ئەوان 22 رەگەز نێر و 8 رەگەز مێ، پشكداری خۆلا زمانێ ئنگلیزی ببوون كو ئاستێن بەری ناڤنجی و ناڤنجی د زمانێ ئنگلیزی دا بخۆڤەدگریت.

بۆ داونلۆدکرنا وێنێن ب کوالتیا بلند، ئەڤی لینکێ ل خوارێ کلیک بکە:

https://drive.google.com/drive/folders/1OZoMgoq8rqzptYaTTaZQmZtBTi2iEyAd?usp=sharing

راگەھاندنا زانكۆیا دھۆك؛ سێشەمب 14ـی گولانێ 2024

فاطمة محمود

فۆتۆ: محەمەد عەبدولكەریم، عەلی بانكی، ھەرمان جانگیر.