ل ژێر دروشمێ (نوژداریا ددانا دناڤبەرا داهێنان و پێشڤەچونێ دا) ب پشكدارای 600 نوژدارێن ددانا دووەم كۆنفرانسێ نێڤدەولەتی یێ پزیشكیا ددانا ل رۆژێن 28 و 29 /3/2019 ل هۆلا كۆنفرانسان ل زانكۆیا دهۆك هاتە گێران.
ل رێورەسمێن دەسپێكێ دا راگرا كۆلیژا پزیشكیا ددانا ل زانكۆیا دهۆك د. بهار جەعفەر دیاركر كو پشكدارێن ڤی كۆنفرانسی ژ وەلاتێن ئەمریكا و ئیتالیا و هولەندا و هندستان و تركیا و مسر و لوبنان و ئیمارات و هەروەسا هەرێما كوردستانێ و عیراقێ نە، كو 45 ڤەكۆلین د هەشت ووركشۆپان دا هێنە گەنگەشەكرن كو 10 ژ وان ڤەكۆلینان دێ هێنە بەلاڤ كرن.
د. بهار جەعفەر هەروەسا گۆت ئارمانج ژ ڤی كۆنفرانسی بلند كرنا ئاستێ زانستی و گەنگەشەكرنا نیترین ڤەكۆلینێن زانستی نە د بیاڤێ نوژداریا ددانان و گوهورینا نیترین پێزانینێن زانستی و دیتنا نیترین ئامیرێن نوژداری یە.
ل دیڤ دا پەیڤا سەندیكا نوژدارێن ددانا ل پارێزگەها دهۆكێ ژلایێ د. سەعید عەلی ڤە هاتە خاندن و بەحسێ بەرنامێ كۆنفرانسی كر و داخازا سەركەفتنی بو ڤەكۆلەران خاست و سوپاسیا هەمی لایەنێن پشكدار كر یێن رێڤەبرنا ڤی كۆنفرانسی كرین.
پارێزگەرێ دهۆكێ فەرهاد ئەمین ئەترووشی د پەیڤەكی دا گۆت ساخلەمی ئێك ژ وان بابەتێن گرنگە ل ناڤا هەر جڤاكەكی دا و پاراستنا ددانا ئێك ژ وان كارێن گرنگێن ساخلەمیێ یە و یا فەرە ئەڤ جۆرە كۆنفرانسە بهێنە گێران، هەروەسا دیاركر كو حكومەتا هەرێما كوردستانێ گرنگیەكا بەرچاڤ دایە ڤی بیاڤی لێ هێشتا نە ل ئاستێ پێدڤی یە، لەورا داخاز كر پتر پشتەڤانیا ڤی كەرتی بهێتە كرن.
سەرۆكێ زانكۆیا دهۆك پ. د. مصلح دهۆكێ د پەیڤەكی دا ل ڤی كۆنفرانسی بەحسێ گرنگیا گرێدانا ڤان جۆرە كۆنفرانسان كر و دیاركر كو زانكۆیا دهۆك هەردەم گرنگیێ ددەتە هەمی بیاڤێن زانستی و پێشڤەچوونێن زانستی ل جیهانی.
هەر د كۆنفرانسی دا هەر ئێك ژ ریڤەبەرێ ساخلەمیا گشتی یا پارێزگەها دهۆكێ و سەندیكا نورژدارێن ددنا ل هەرێمی و سەندیكا نوژدارێن ددانا ل عیراقێ پەیڤ پێكێش كرن بەحسێ گرنگی پێدانێ ب لایەنێ نوژدایا ددانان كرن.
دیسا پێشانگەهەك ژلایێ لژنا بلندا كۆنفرانسی كو نزیكی 30 كۆمپانیێن كەلوپەلێن پزیشكیا ددانان پشكداری تێدا كربوو هاتە نیشادان.