ب ئامادەبوونا د. داود سلێمان ئەتروشی سەرۆكێ زانكۆیا دھۆك و د. زیاد مەحفوز عەبدولقادر راگرێ كولیژا پەروەردا جەستەیی و زانستێن وەرزشی و مامۆستا و قوتابیێن كولیژا ناڤبری، پێشانگەھا ڤەكۆلینێن دەرچوونێ یا چوارێ ل ٧ـی گولانێ ٢٠٢٣ ھاتە سازكرن.
پێشانگەھ بۆ ڤەكۆلینێن دەرچوونێ یێن قوتابیێن قوناغا چوارێ یێن كولیژا ناڤبری ھاتبوو رێكخستن كو ژ ٤٥ ڤەكۆلینان پێكدھات، ٣٠ ژ ئەوان ب شێوەیێ پۆستەر ھاتبوونە نیشاندان، ١٦ یێن دی ھاتنە ئەنجامدان گەنگەشەکرن.
ڤەكۆلینێن قوتابیا د بوارێن جودا یێن گرێدای پەروەردا جەستەیی و زانستێن وەرزشی دا ھاتبوونە ئەنجامدان، پتریا ڤەكۆلینان ل دۆر ئاریشێن یاریێن وەرزشی یێن جودا بوون، ھندەكێن دی گرێدای لایەنێ دەروونی و ئەكادیمی یێ مامۆستا و قوتابیێن كۆلیژا ناڤبری بوون.
د. داود ئەتروشی گەریانەك ل ناڤ ڤەكۆلینێن نیشاندای كر و دانوستاندن ل گەل قوتابیێن ڤەكۆلەر ل دۆر بابەت و ئارمانج و ئەنجام و راسپاردەیێن ڤەكۆلینان ئەنجامدان، دیسان ل ئەنجامدانا گەنگەشەیا ڤەكۆلینێن ھندەك قوتابیان ئامادەبوو.
ئێك ژ ڤەكۆلینێن ھاتینە نیشاندان ل دۆر ئەگەرێن رێژا سەرەدانا قوتابیێن كۆلیژا ناڤبری بۆ پەرتووكخانا كولیژێ ھاتبوو ئەنجامدان، ڤێ ڤەكۆلینێ ئەگەرێ سەرەكی بۆ دەگمەنیا ژێدەران ب زمانێ كوردی دزڤراند، د. زیاد مەحفوز ئەڤ ئاریشە وەك بەربەستەك بەرامبەر قوتابیا د ئەنجامدانا ڤەكۆلینا دا دیاركر، د دویڤ دا د. داود ئەترۆشی باس ل گرنگیا وەرگێرانا ژێدەرا بۆ زمانێ كوردی كر و ھاندانا مامۆستایێن كولیژا ناڤبری كر بۆ وەرگێرانا پەرتووكێن پەیوەندیدار ب بابەتێن كولیژا ناڤبری ڤە.
دیسان ڤەكۆلینەكا دی ل دۆر كاریگەریا ھندەك راھێنانا ل گەل ریتما مۆزیكێ و سەمایا كوردی ل سەر ھندەك سالۆخەتێن جەستەیی و ئاستێ پالدەریا قوتابیان ھاتبوو ئەنجامدان، ئەنجامێن ڤێ ڤەكۆلینێ دیاركر كو بكارئینانا ریتما مۆزیكێ و سەمایا كوردی پالدەرێ قوتابیان بۆ وانەیا وەرزشێ بەرزتر لێدكەت و سالۆخەتێن جەستەیی ب شێوەیەكێ باشتر پەیدادكەت ب بەراورد ل گەل راھێنانێن ئاسایی.
ل دویماھیێ د. داود ئەتروشی دەستخۆشی ل قوتابی و مامۆستایێن كولیژا پەروەردا جەستەیی و زانستێن وەرزشی كر و ھیڤی خوازت ئەڤ ڤەكۆلینە ببنە ئەگەرێ چارەسەركرنا ئاریشەیان و مفای بگەھیننە جڤاكی. ھەژی ئاماژەدانێ یە كو كولیژا ناڤبری سالانە پیشانگەھا ڤەكۆلینێن دەرچوونێ ئەنجامددەت بۆ دانەنیاسینا كار و ڤەكۆلین و پرۆژێن قوتابیان.
راگەھاندنا زانكۆیا دھۆك؛ ٩ـی گولان ٢٠٢٣
راپۆرت: ماھر كێستەیی
فۆتۆ: محەمەد عەبدولکەریم