ب مەرەما پشتەڤانیا گەنجان ل ناڤخۆ و دەرڤەی پارێزگەها دهۆکێ بۆ پێشڤەبرنا شیانێن وان یێن دانوستاندنێ ب زمانێ ئنگلیزی و خۆ رزگاركرن ژ ترس و شەرما ئاخڤتنێ، كوژیێ ئەمریکی ل زانکۆیا دهۆك خولەکا نوی یا یانا زمانێ ئنگلیزی بۆ هژمارەکا گەنجان و قوتابی و دەرچوویێن زانکۆیێ ڤەکر.
ئەڤ خولە، ل ۱۸ـێ نیسانێ ۲٠٢٤ دەستپێکریە و نێزیکی ۳ هەیڤان دێ یا بەردەوام بیت و ل کوژیێ ئەمریکی دهێتە ئەنجامدان. هەروەسا، نێزیکی ٢٠ گەنجان ب خۆ ڤە دگریت و ل دویماهیا خولێ دێ باوەرنامە ل سەر پشکداران دا هێنە دابەشکرن. خولا یانا زمانێ ئنگلیزی یا ڤەکریە و بێ بەرامبەرە بۆ هەر كەسێ بڤێت پشکدار بیت. دهێتە زانین کو چەندین جاران خولێن هەڤشێوە بۆ گرۆپێن جودا هاتیە ئەنجامدان.
دێژین نزار، قوتابیا سالا ئێکێ یە ل کۆلیژا زمانان ل پشکا زمانێ ئنگلیزی کو هاریکاریا پشکداربوویان دکەت وەك راهێنەرەکا خۆبەخش د خولێ دا، گۆت: "من تێبینی کریە کو گەلەك کەس ژ ئەگەرێ بەربەستێن جڤاکی شەرم دکەن ب ئنگلیزی باخڤن ل جهێن گشتی دا، ئەڤێ چەندێ وەکریە کو دەرفەتێ ب گەنجان بدەم کو ل چ جهێن هەبیت بشێن بیرۆکا خۆ دەرببرن و پشکداری دیالۆگێ بن.
ژ لایەکێ دی ڤە، رێکخەرێ كوژیێ ئەمریکی، شەریف سەبری، دیارکر کو گرنگترین ئارمانجا كوژیێ ئەمریکی ئەوە پشتەڤانیا گەنجان بکەت كو ل دەمێ ئاخڤتنێ ب زمانێ ئنگلیزی، هەست ب ئارامیێ بکەن ، ژبەرکو راهێنان فاکتەرێ سەرەکیە بۆ فێربوونا هەر تشتەکی. ب ڤی شێوەی، ب رێکا ڤێ خولێ، پشکدار شارەزاییا خۆ یا زمانی بهێزتر دكەن و هەروەسا هاریکاریا وان دكەت د کارێن پاشەرۆژی دا.
هەر وەكی پێشتر ئاماژە پێ هاتیەکرن، یانا زمانێ ئنگلیزی وەك پلاتفۆرمەکا بێ وێنە، بۆ قوتابی و دەرچوویان خزمەتێ دکەت بۆ دەربرینا هزر وبیرێن خۆ ب زمانێ ئنگلیزی و ئاڤاكرنا پەیوەندیەکا نوی ل گەل ئەندامێن جڤاکی. ئەڤە د چارچۆڤێ ئارمانجێن مەزنترێن كوژیێ ئەمریکی دایە، ئەوژی پشتەڤانیکرنا گەنجانە ل سەرانسەری دهۆك و کوردستانێ ب رێکا دابینکرنا کۆرس و چالاکیێن پەروەردەیی، رەوشەنبیری، پیشەیی، و دەمبۆراندن و مفاوەرگرتنێ، کو ژ لایێ کونسۆلخانا گشتی یا ئەمریکا ل هەولێرێ ڤە دهێتە پشتەڤانیکرن.