كولیژا پەروەردا جەستەیی و زانستێن وەرزشی كۆنفرانسەك بۆ پرۆژێن دەرچوونێ یێن قوتابیان گێرا
May 16, 2022, 12:24 p.m.

 

ئەڤرۆ رێکەڤتی ١٥/٥/٢٠٢٢، كولیژا پەروەردا جەستەیی و زانستێن وەرزشی ل زانكۆیا دهۆك سێیەمین كۆنفرانسێ‌ پرۆژێن ڤەكۆلینێن زانستی یێن دەرچوونێ‌ بۆ قوتابیێن قووناغا چوارێ‌ ل هۆلا گرتی یا كۆلیژێ‌ گێرا.

راگرێ‌ كولیژا پەروەردا جەستەیی و زانستێن وەرزشی ل زانكۆیا دهۆك د. ئەحمەد قاسم د پەیڤەكی دا دیاركر "ئەڤ سالە ٤٦ ڤەكۆلینێن زانستی یێن دەرچوونێ‌ ب شێوێ‌ گرۆپ ژلایێ‌ قوتابیێن قووناغا چوارێ‌ ڤە هاتینە بەرهەڤكرن، ٣٦ ژ وان بووینە پۆستەر و هاتینە نیشادان و ١٠ ڤەكۆلین ژی ب شێوێ‌ نامیلكەنە"، گۆت ژی "ژ دەستپێكا هەیڤا ١١ دەست ب بەرهەڤیان هاتیە كرن بۆ ئەنجامدانا ڤان ڤەكۆلینان ژلایێ‌ قوتابیان ڤە".

د. ئەحمەد قاسم ئەو ژی دیارکر كو ٣٠ نمرە یێن ڤەكۆلینێن زانستی دێ‌ ژلایێ‌ مامۆستایێ‌ سەرپەشت ڤە هێنە دانان، لدویڤ پێگیریا قوتابی ب دەمی و ئەو ئەركێ‌ مامۆستا بۆ دیاردكەت، ٥٠ نمران ژی ئەو مامۆستایێن هەلسەنگاندنێ‌ بۆ دكەن دێ‌ دانن، ٢٠ نمرە ژی دێ‌ لسەر گەنگەشا ڤەكۆلینێ‌ بیت.

هاریكارێ‌ سەرۆكێ‌ زانكۆیا دهۆك بۆ كاروبارێن زانستی و خواندنا بلند د. لوقمان هادی حەسەن د پەیڤەكی دا خۆشحالیا سەرۆكاتیا زانكۆیێ‌ ب ڤان جۆرە چالاكیان دیارکر و گۆت: "پرۆژێن دەرچوونێ‌ یێن قوتابیان گرنگیەكا تایبەت هەیە، چونكو ئەو زانستێ‌ قوتابیان ب درێژاهیا ڤان چوار سالان ل كولیژێ‌ وەرگرتی ڤەرێژا وی ل پرۆژێ‌ دەرچوونێ‌ دا رەنگڤەددەت".