پشكا مێژوو ل كولیژا زانستێن مرۆڤایەتی ل زانكۆیا دهۆك، ب هەڤكاری دگەل رێڤەبەریا گشتی یا رەوشەنبیری و هۆنەری ل دهۆكێ، ئەڤرۆ رێکەڤتی ٢٠٢٢/٣/١٥ و ل سەنتەرێ کونفرانسان ل زانکۆیا دهۆک، كۆربەندەك لدۆر بیرەوەریا سەرهلدانا باژێرێ دهۆكێ سازکر.
د ڤی كۆربەندی دا سەرۆكێ زانكۆیا دهۆك، د. داوود سلێمان ئەترووشی، د پەیڤەكی دا گۆت: "سەرهلدانا سالا 1991 وەرچەرخانەكا مەزن بوو د دیرۆكا كوردستانێ دا، مەزناهیا ڤێ بوویەرێ د وێ یەكێ دا بوویە كو پشتی هزاران سالان ژ بندەستیێ و قەبویلكرنا وێ راستیێ كو ئەم مللەتەكێ ژێردەستین و مە گەلەك سەردەست هەنە، ئێدی قۆناغەكا نوییا سەردەستیێ ژ دیرۆكا كوردستانێ دەستپێكر، سەرهلدان بوویەركا مەزن بوویە د دیرۆكا كوردستانێ دا و مۆرەكا جودا ل دیرۆكا كوردستانێ نەخشاند، سەرهلدان بۆ خالەك، كو خەباتا كوردستانیان بەرەڤ زانینێ ڤە بچیت، بەری سەرهلدانێ زۆربەیا هەرەزۆرا گوندێن مە بێ قوتابخانە بوون، بتنێ دوو زانكۆ ل باشۆرێ كوردستانێ هەبوون، لێ سوپاس بۆ قوربانیدانا پێشمەرگێن قارەمان و شەهیدێن سەرهلدانێ و هەمی شۆرەش و بەرخۆدانێن كوردستانیان، ئەڤرۆ ب دەگمەن گوندەكێ بێ قوتابخانە دبینین، ب دەهان زانكۆ ل كوردستانێ هاتینە دامەزراندن، زانین بوویە بەرهەمێ شۆرەش و سەرهلدانان".
سەرۆكێ زانكۆیا دهۆك ئەوژی گۆت: "هێز، زانینێ پەیدادكەت، زانین ژی، هێزێ پەیدادكەت، تاكو مە چەپەرێن مەزن شكاندین، مە هێز و بیروباوەرێن خۆ كرنە د خزمەتا دۆزا خۆ دا، مە ستەم قەبیل نەكر، ئەڤ زانین و پەروەردە ژی ژ خەبات و شۆرەش و بیروباوەرێن بارزانیێ نەمر بووینە، جارێ ئەو سەرهلدانا دیرۆكا مە وەرچەرخاندی و ئەڤرۆكە ئەم بیرەوەریا وێ ساخدكەین، بەرهەمێ هزر و خەبات و شۆرەشێن بارزانیێ نەمر بوویە، كو ئەڤرۆكە، دگەل ساخكرنا بیرەوەریا سەرهلدانا باژێرێ دهۆكێ، ئەم ب شانازی ڤە، بیرەوەریا ژدایكبوونا بارزانیێ نەمر ساخدكەین".
لدویڤدا پارێزگارێ دهۆكێ، د. عەلی تەتەر د پەیڤەكی دا گۆت: "ب درێژاهیا هەمی مێژوویا گەلێ كورد و كوردستانێ چ رویدان ژ سەرهلدانێ مەزنتر و خۆشتر نەبووینە، گەلەك سەركەڤتن و شۆرەش هەبووینە، بەلێ یا سەرهلدانێ یا پری دەستكەڤت بوو، و دڤێت ژی سەرهلدان بمینیت پیرۆزترین و خۆشترین رویدان د مێژوویا گەلێ مەدا".
پارێزگارێ دهۆكێ ئاماژە دا وێ چەندێ ژی كو سەرهلدان بابەتەكێ گرنگە بۆ مامۆستا و ڤەكۆلەر و قوتابیان، لەورا پێدڤیە بزاڤان بكەین سەرهلدانێ ڤەكۆلینێن پتر لدۆر سەرهلدانێ ئەنجامبدەین، مێژوویا سەرهلدانێ بهێتە نڤیسین، و چەند زویترە؛ باشترە، چونكو هەر رۆژەكا دەرباز دبیت، كۆمەكا کەسایەتیێن رۆل تێدا دیتین د ژیانێ دا نەمینن.
سەرۆكێ پشكا مێژوو ل كولیژا زانستێن مرۆڤایەتی، د. فەرهاد ئەحمەد، د پەیڤەكی دا گۆت: "بابەتێ سەرهلدانێ و ب تایبەت یا باژێرێ دهۆكێ، هێشتا وەكو پێدڤی گرنگی پێ نەهاتیە دان، لەورا پێدڤیە هەر ئێك ژلایێ خۆ ڤە گرنگیێ ب كولتۆرێ سەرهلدانا باژێرێ دهۆكێ و رەهەندێن وێ یێن سیاسی و ئابووری و جڤاكی و مێژوویی بدەت، كۆمەكا بابەت و رووبەرێن ڤەشارتی د ڤی بواری دا هەنە".
د. فەرهاد ئەحمەد، ئەو ژی ئاشكرا كر، ل پشكا مێژوو پرۆژەك هەیە بۆ دانانا سەنتەرەكی ل زانكۆیا دهۆك ب ناڤێ سەنتەرێ مێژوویا زارەكی، كو ڤی سەنتەری دێ گرنگیا خۆ هەبیت، ب تایبەت بۆ نڤیسینا مێژوویا باژێرێ دهۆكێ و تایبەت پشتی سالا ١٩٧٥ێ، کو وەکو پێدڤی لدۆر نەهاتیە نڤیسین.
هەر د كۆربەندی دا كورتە فلمەكێ بەلگەنامەیی لدۆر سەرهلدانا دهۆكێ هاتە نیشادان، و لدویڤدا ژی پەنەلەك هاتە ئەنجامدان ب پشكداریا وان كەسێن رۆل د سەرهلدانا باژێرێ دهۆكێ و سێمێلێ دا هەی، ئەو ژی ئیسكان یووسف، و محیەددین مەعروف و خالد بانی بوون و ب درێژی باس ل پشكداری و رویدانێن لدویڤ ئێک یێن سەرهدانا سالا ١٩٩١ێ كرن.