ل زانكۆیا دهۆك یەكەیا پشتەڤانیا قوتابیێن ئاوارە و پەناران هاتە ڤەكرن
Jan. 23, 2019, 7:29 p.m.

ل زانكۆیا دهۆك د رێورەسمەكی دا ل رۆژا 15/1/2019 یەكەیا پشتەڤانیا قوتابیێن ئاوارە و پەناران ل ناڤەندا قوتابیان هاتە ڤەكرن و رێورەسمەك ب ڤێ‌ هەلكەفتێ‌ ل سەنتەرێ‌ رەوشەنبیری و جڤاكی یێ‌ زانكۆیێ‌ هاتە رێكخستن. 
ئەڤ یەكەیە ئێكە ژ پرۆژێن ئێكەتیا ئورۆپی كو پشتەڤانیا فێركرنا ئاواران دكەت ل بن ناڤێ‌ (ریسكیو) یان قورتال كرن، هەروەسا ئێكە ژ پرۆژێن ئیراسموس پلەس كو هەمی مەزاختیێن ڤی پرۆژەی ژ لایێ‌ ئێكەتیا ئورۆپی ڤە دهێنە دابین كرن و ل سالا 2016 هاتیە پێشكێش كرن ب هەڤكاری دگەل زانكۆیێن پشكدار د ڤی پرۆژەی دا. 
ئارمانجێن پرۆژەی راهێنانا كادرانە ژ زانكۆیا دهۆك و زانكۆیێن پشكدار ل دۆر چاوانیا چارەكرنا ئاریشێن خواندنێ‌ یێن ئاوارە و پەنابەران و قوتابیێن ئاسایی د ماوێ‌ مانا وان ل زانكۆیێ‌ و دەمێ‌ پێشكێشی خاندنێ‌ دكەن، كو هندەك كادر ژ زانكۆیا دهۆك راهێنان پێ‌ هاتینە كرن ل دۆر پتریا ئاریشێن قوتابی تووش دبێ‌ ب رەنگەكێ‌ گشتی و قوتابیێن ئاوارە و پەنابەر ب رەنگەكێ‌ تایبەتی، هەروەسا ئاریشێن دەروونی یێن ڤان قوتابیان ژی ل بەر چاڤ هاتینە وەرگرتن هەروەسا ئاریشێن تایبەت ب دابینكرنا بەلگەیێن پێدڤی و چاوانیا پەیداكرنا رێكێن ئەلتەرناتیڤ.