ل رۆژا دووشەمبی، رێکەڤتی 6/9/2021، د. داود سلێمان ئەتروشی، سەرۆکێ زانکۆیا دهۆک، و هاریکارێ سەرۆکێ زانکۆیێ د. لوقمان هادی حەسەن، د سەرەدانەکێ دا بۆ کولیژا زمانان، دگەل جڤاتا کولیژا ناڤبری کۆمبوو.
د ڤێ كۆمبوونێ دا، سه‌رۆكێ زانكۆیێ دیاركر كو پشكێن كۆلیژا زمانان گرنگییه‌كا تایبه‌ت هەیە ژبه‌ر كاریگه‌ریا وان یا راسته‌وخۆ ل سه‌ر تاكێ جڤاكى، ب تایبه‌ت پشکا زمانێ كوردى كو زمانێ دایكێ یه و ناسنامەیە و پێگوهۆرێن وێ بزەحمەتن. دیارکر ژی کو ئه‌گه‌ر قوتابىێن وێ پشکێ ب شێوەیە‌كێ باش بهێنە پێگەهاندن، دێ شێن رڤشتەکی ئاڤابکەن، کو نوینەراتییا ناسنامە و ئەدەب و کەلتۆرێ کوردی بکەن.
هەر د ڤێ کۆمبوونێ دا، سەرۆکێ زانکۆیا دهۆک ئاماژە ب وێ یەکێ دا کو "پێدڤییە پشکا زمانێ کوردی رێنیشاندەرەکا زمان و ئەدەب و کەلتۆرێ کوردی بیت و هەر سێ پشکێن ڤێ کولیژێ خزمەتەکا زمانڤانی پێشکێشی هەمی پشکێن دی یێن زانکۆیا دهۆکێ بکەت". دیسان ژی، ئاماژە دا وێ یەکێ کو پێدڤییە پشکا زمانێ کوردی رۆل د دانانا رێنڤیسه‌كا كوردى یا دروست دا هەبیت بۆ نڤیسار و به‌لاڤۆكێن زانكۆیێ.
ژلایه‌كێ دیڤه، سه‌رۆكێ زانكۆیێ دیاركر كو یا پێدڤییه گرنگى ب كوالتیا خواندنێ بهێته دان و ده‌رچوویه‌كێ كاریگه‌ر پێشكێشى جڤاكى بكه‌ین و ڤه‌كۆلینێن دهێنه ئه‌نجامدان، پێدڤییه ئاریشێن جڤاكى چاره‌سه‌ربكه‌ن. هه‌روه‌سا گرنگە هه‌ر پشكه‌ك ل دویڤ تایبه‌تمه‌ندیا خۆ بچیته دناڤ جڤاكى دا، ب رێکا بکارئینانا ئالاڤێن جودایێن گەهاندنێ. واتە، ل وی دەمی گرنگییا زانکۆیێ بلندتر لێدهێت، دەمێ مفادارێ سەرەکیێ کار و چالاکیێن وێ جڤاک بیت.