رێكخراوا 88 یا ناساندنا تاوانێن ئەنفالێ ب هەڤكاری ل گەل زانكۆیا دهۆك و رێڤەبەریا گشتی یا كاروبارێن شەهید و ئەنفالكریان ل دهۆكێ ل بیرەوەریا 28 سالیا تاوانا ئەنفالان، بیرئینانا ڤێ یادێ كر ب ڤەكرنا پێشانگەهەكا وێنێن ئەنفالان ل رۆژا 14/4/2016 ل ناڤەندا قوتابیان ل زانكۆیا دهۆك.
هەر ل ڤێ یادێ بەیاننامەك ژ لایی رێكخراوا 88 یا ناساندنا تاوانێن ئەنفالێ هاتە بەلاڤ كرن و ئاراستە كرن بۆ دەستهەلاتدارێن عیراقا فیدرال، تیدا هاتیە كو جهێ داخێ یە پشتی بورینا 28 سالان هیشتا مافێ بەركەفتیێن تاوانێن ئەنفالان نەهاتینە دابین كرن.
د پشكەكا دی یا بەیاننامێ دا هاتیە حكومەتا نوكە یا عیراقێ كو میراتگرا حكومەتا بەرێ یا عیراقێ یە بەرپرسە ژ پێدان و قەرەبووكرنا وان، هەروەسا پێدڤیە لێگەریان ل روفاتێن وان ئەنفالكریا بهێتە كرن ئەوێن هەتا نوكە ل دەڤەرێن ژێریا عیراقێ هاتینە بن ئاخ كرن و نەهاتینە دیتن.
هەر ل ڤی رێورەسمی سەرۆكێ زانكۆیا دهۆك پرۆفیسۆر د. مسلح دهۆكی د پەیڤەكی دا گۆت ئەڤ كارەسات و تاوانە دهێنە بیرئینان ژ بۆ وێ چەندێ دا بهێتە زانین كو حكومەتێن بەرێ یێن عیراقێ چ زولم و زورداری ل مللەتێ كورد كریە و مفا ژ وان سەربورا بهێتە وەرگرتن داكو ئەڤ تاوانە دوبارە نەبن.