پشتی شاندەکێ زانکۆیا دهۆک، پشکداریەکا چالاک د ئێکەم کۆنفرانسێ زانستیێ وەزارەتا خواندنا بلند و ڤەکۆلینێن زانستی دا ل دۆر بۆلۆنیا پرۆسێس کری، د رێورەسمەکی دا، سوپاسی و رێزلێنان ژ لایێ سەرۆکێ زانکۆیێ ڤە هاتنە پێشکێشکرن.
ئەڤرۆ رێکەڤتی ٣١ـێ تەباخا ٢٠٢٢ـێ ل سەرۆکاتیا زانکۆیا دهۆک، ژبەر رۆلێ چالاکێ یێ شاندێ زانکۆیا دهۆک د ئێکەم کۆنفرانسێ زانستی دا ل هەرێما کوردستانێ ل دۆر پێڤاژۆیا بۆلۆنیا، ب ئامادەبوونا هاریکارێ سەرۆکێ زانکۆیێ د. لوقمان هادی حەسەن، سوپاسی و رێزلێنان ژلایێ سەرۆکێ زانکۆیێ ڤە بۆ دکتۆڕ و مامۆستایێن پشکدار هاتنە پێشکێشکرن.
سەرۆکێ زانکۆیا دهۆک خۆشحالیا خۆ بەرامبەر وێ پشکداریا چالاک یا شاندێ زانکۆیا دهۆک دیارکر و هیڤی خواست کو شاندێ پشکدار مفا ژ کۆنفرانسێ ناڤهاتی وەرگرتبیت.
هەر د رێورەسمێن رێزلێنانێ دا، گۆتۆبێژ هاتنەکرن د ناڤبەرا پشکدارێن کۆنفرانسی و سەرۆکێ زانکۆیێ دا و تێدا پەسنا رۆلێ سەرۆکێ زانکۆیێ هاتەکرن و پالپشتی و پشتەڤانیا وی یا بەردەوام بۆ مامۆستایێن زانکۆیا دهۆک.
هەژی ئاماژێ یە، ل ٢٨ و ٢٩ـێ تەباخێ ٢٠٢٢ـێ ل هەولێرێ، ئێکەم کۆنفرانسێ زانستیێ وەزارەتا خواندنا بلند و ڤەکۆلینێن زانستی ل دۆر بۆلۆنیا پرۆسێس هاتە ئەنجامدان و زانکۆیا دهۆک ب ٩ پەنەلیستان رۆلەکێ سەرەکی د ڤی کۆنفرانسی دا گێرا.