بۆ دروستکرنا مۆزەخانەکێ لدۆر جینۆسایدان زانکۆیا دهۆک کۆمبوونەک ئەنجامدا
April 18, 2022, 1:56 a.m.

 

ب مەرەما بجهئینانا پرۆژەیێ دروستکرنا مۆزەخانەکا مۆدێرن و نیشتیمانی ل کەلا نزارکێ، کو یا تایبەت  بیت ب ئەنفال و جینۆسایدێن دژی گەلێ کوردستانێ هاتینە ئەنجامدان ، ئەڤرۆ رێکەڤتی ١٧/٤/٢٠٢٢ سەرۆکێ زانکۆیا دهۆک د. داوود سلێمان ئەترووشی کۆمبوونەک دگەل لایەن و مامۆستا و کەسایەتیێن بسپۆر و پەیوەندیدار ب ئەنفال و جینۆسایدا ڤە ئەنجامدا.

 

د ڤێ کۆمبوونێ دا و ب بەرهەڤبوونا فەهیم عەبدوللا حەمۆ سەرۆکێ جڤاتا پارێزگەها دهۆکێ و هژمارەک ژ رێڤەبەرێن حکوومی و رێکخراو و کەسایەتیێن بسپۆر و پەیوەندیدار ب بابەتێ جینۆسایدێ ڤە، دانوستاندنێن هویر و زانستی لدۆر ناڤ و ناڤەرۆک و پێکهاتە و گرنگیا ڤی پرۆژەی هاتنە ئەنجامدان.

 

ل دەستپێکێ سەرۆکێ زانکۆیا دهۆک ئاماژە ب گرنگیا مەزنا پرۆژەی دا و رۆلێ زانکۆیا دهۆک د ڤی بابەتی دا و گرنگیا هەڤکاریێ د ناڤبەرا لایەنێن پەیوەندیدار دا بۆ کارکرنەکا رژد بۆ ئەنجامدانا ڤی پرۆژەیێ مەزن و گۆت: "زانکۆیا دهۆک گرنگیەکا مەزن ب ڤی پرۆژەی ددەت و ئەم دێ هەمی بزاڤا کەین کو زانکۆیا دهۆک ببیتە چەترەک بۆ دروستکرنا هەماهەنگیێ د ناڤبەرا لایەنێن پشکدار دا ب ئارمانجا بجهئینانا ڤی پرۆژەی". د. داوود ئەترووشی هەروەسا دیارکر "بەری نوکە پرۆژەیەکێ ب ڤی رەنگی هەبوویە و کار تێدا هاتیە کرن، لێ ژبەر کاودانێن ئێمناهی و ئابووری و شەرێ دژی داعش، ئەڤ پرۆژە هاتە راوەستاندن، لێ وەکو زانکۆیا دهۆک، ژبەر گرنگیا ڤی پرۆژەی بۆ هەرێما کوردستانێ ب گشتی و پارێزگەها دهۆکێ ب تایبەتی، مە دڤێت ڤی پرۆژەی ب شێوەیەکێ پتر رێکخستی و پلان بۆ دانای دەستپێبکەینە ڤە".

 

ژ لایێ خۆ ڤە، د. سالم جاسم سەرۆکێ سەنتەرێ ڤەکۆلینێن جینۆسایدێ ل زانکۆیا دهۆک باس ل گرنگی و کاریگەری و ناڤەرۆک و ئارمانجێن پرۆژەی کر و ئاماژە دا  گرنگیا کەلا نزارکێ و گۆت: "جینۆساید د سێ قۆناغا را دەرباسدبیت، پلانا بکەرێن جینۆسایدێ، کۆمکرنا قوربانیا و پاشی ژناڤبرنا وان، پێنگاڤا دووێ یا جینۆسایدا دژی خەلکێ دەڤەرا بادینان ل کەلا نزارکێ بوویە". پاشی ناڤبری باس ل بزاڤێن بەری نوکە یێن زانکۆیا دهۆک کر بۆ بجهئینانا ڤی پرۆژەی.

 

سەرۆکێ جڤاتا پارێزگەها دهۆک فەهیم عەبدوللا ژ لایێ خۆ ڤە باس ل وێ یەکێ کر کو ئەڤە چەندین سالە دانوستاندن لدۆر ڤی پرۆژەی دهێنەکرن، لێ وەکو پێدڤی کار لدۆر جینۆسایدێ نەهاتیە ئەنجامدان. هەروەسا ئاماژە دا ئەزموونێن گەلێن تووشی جینۆسایدێ بووین و گۆت: "خەلکەکی گەلەک ب رژدی و جوانی لدۆر جینۆسایدێن دژی مللەتێن وان هاتینە کرن کارکریە کو ئەڤ دیرۆکە د سەرێ رڤشتێ نوی ژی دا ساخ هێلایە، چونکو ئەگەر وەکو پێدڤی کار نەهێتە کرن، دێ ڤەقەتیان د ناڤبەرا رڤشتا دا دروستبیت و د ئەنجامدا دێ ژ دیرۆکا خۆ ڤەقەتیێن، ئەڤە ژی مەترسیەکا مەزنە. جهێ خۆشحالیێ یە کو ل ڤان سالێن دویماهیێ رژدیێ د ڤی بواری دا دبینم، ب تایبەت ژ لایێ سەنتەرێ ڤەکۆلینێن جینۆسایدێ ل زانکۆیا دهۆک".

 

پاشی هەمی لایەن و کەسایەتیێن ئامادەبووی بۆچوون و پێشنیار لدۆر ڤی پرۆژەی نیشاندان و باس ل هویرکاریێن کارێ بەری نوکە هاتیە ئەنجامدان د ڤی بواری دا و گرنگیا کۆمکرنا بەلگەیێن فیزیکی و نڤیسکی و زارەکی یێن گرێدای ئەنفال و جینۆسایدێن دژی گەلێ کوردستانێ کر. ل دویماهیێ ژی باس ل قۆناغا داهاتی یا هەماهەنگیێ و پێکئینانا لیژنەیەکا سەرەکی و پاشی لیژنەیێن تایبەتمەند  بۆ ئەنجامدانا ڤی پرۆژەی هاتەکرن.