سەرۆکێ زانکۆیا دهۆک پێشوازی ل قونسولێ گشتیێ یۆنانێ کر
July 20, 2022, 12:33 a.m.

ئەڤرۆ رێکەڤتی ١٩/٧/٢٠٢٢، سەرۆکێ زانکۆیا دهۆک د. داود سلێمان ئەتروشی پێشوازی ل قونسولێ گشتیێ یۆنانێ ل هەولێرێ د. ستاڤرۆس کیریمس کر. د روینشتنەکێ دا و ب ئامادەبوونا هەردوو هاریکارێن سەرۆکێ زانکۆیێ د. ئەحمەد محەمەد سالح و د. مێڤان عارف عەبدولرەحمان، دانوستاندن لدۆر دەلیڤێن هەڤکاری و هەماهەنگیێ د ناڤبەرا زانکۆیا دهۆک و زانکۆیێن یۆنانێ دا هاتنە کرن.

ل دەستپێکا کۆمبوونێ، قونسولێ گشتیێ یۆنانێ باس ل بزاڤێن خۆ یێن دروستکرنا پەیوەندیان و پرۆژێن هەڤپشک دگەل ناڤەندێن ئەکادیمیێن هەرێما کوردستانێ کر و هەروەسا پێشەکیەکا گشتی دا بزاڤا ئەکادیمی ل یۆنانێ و ئاماژە ب وێ یەکێ دا کو زانکۆ رۆلێ هەرەسەرەکی د باژێریبوون و پێکئینانا جڤاکێ مۆدێرن دا دگێریت. هەروەسا ئامادەییا وەلاتێ خۆ دیارکر بۆ هەماهەنگیێ و پرۆژێن هەڤپشک دگەل زانکۆیا دهۆک.

ژ لایێ خۆ ڤە د. داود ئەتروشی پشتی دەربرینا خۆشحالیا خۆ ب ڤێ سەرەدانێ، باس ل پلان و سیاسەتێن نوی یێن زانکۆیا دهۆک کر و ئەو بوارێن پێشینەیی یێن سەرەکی ئەوێن سەرۆکاتیا زانکۆیێ د ڤێ قوناغێ دا جەختێ لسەردکەت خویاکرن. هەروەسا سەرۆکێ زانکۆیێ گەشبینیا خۆ دەربڕی لدۆر هەڤکاری و هەماهەنگیا پاشەرۆژی د ناڤبەرا زانکۆیا دهۆک و زانکۆیێن یۆنانی دا. ل دویماهیێ و وەکو بیرهاتن، سەرۆکێ زانکۆیا دهۆک لۆگۆیەکێ زانکۆیێ و وەرگەرەکا مەم و زینا ئەحمەدێ خانی پێشکێشی قونسولێ گشتیێ یۆنانێ کرن.