ئەڤرۆ ڕۆژا چوارشەمب، رێکەڤتی ٢٤ـێ نیسانێ ٢٠٢٤، ناڤەندا قوتابیان ل زانکۆیا دهۆك پێشانگەهەکا شێوەکاری ب ناڤونیشانێ "سرۆش ٢" بۆ شێوەکار و مامۆستایێ سامان کەریم ڤەکر.
ل دۆر رامانا ناڤێ پێشانگەهێ "سرۆش ٢" شێوەکار سامان کەریم دیارکر، سرۆش ب رامانا ئیلهام دهێت، کو مەبەست پێ؛ گەهاندنا هزرا شێوەکاری یە و ئەو شێوازێ دەربرینێ یە، ئەوێ ژ لایێ هۆنەرمەندی ڤە هاتیە بکارئینان.
ژ لایەکێ دی ڤە، شێوەکار سامان کەریم دەربارەی تابلۆیان دیارکر، د پێشانگەهێ دا، پشتبەستنا سەرەکی ل سەر هۆنەرێ شێوەکاری یێ ئەبستراکت هاتیە کرن و هەر تابلۆیەك ب شێوازەکی رامانێ دگەهینیت، بەلێ پتریا تابلۆیان دەربرینا هەستێ یە.
سامان کەریم ، هۆنەرمەند و مامۆستایێ زانکۆیا دهۆک ل ١٩٨٢ ل ئامێدیێ ژدایکبوویە، ل سالا ٢٠٠٥ـێ بەکالۆریۆس ب تەلارسازیێ ل زانکۆیا سەلاحەدین-هەولێر بدەستڤەئینایە و ل سالا ٢٠١٢ـێ ماستەر ل زانکۆیا تێکساس تێک ل ویلایەتێن ئێگرتیێن ئەمریکا بدەستڤەئینایە. ل سالا ٢٠٠٢ـێ پشکداری د پێشانگەها شێوەکاریا زانکۆیا سەلاحەدین-هەولێر دا کریە، هەروەسا ل سالا ٢٠٠٥ـێ پێشانگەهەکا تایبەت ل زانکۆیا سەلاحەدین-هەولێر ڤەکریە. دیسان ل سالا ٢٠١٢ـێ پشکداری د پێشانگەها شێوەکاری دا ل زانکۆیا تێکساس تێک ل ئەمریکا کریە. ژ لایەکێ دی ڤە و ل سالا ٢٠١٣ـێ پشکداری د دروستکرنا مۆنیومێنتا دادپەروەری دا، ل کۆلیژا یاسا یا زانکۆیا دهۆک دا کریە. هەروەسا ل سالا ٢٠١٩ـێ پێشانگەها "سرۆش ١" ل گەلەریا دهوک ڤەکریە و ل سالا ٢٠٢٢ـێ پشکداری د وۆرکشۆپا هۆنەر و ریسایکلینگ دا ل بەسرا کریە و ل ٢٠٢٣ـێ پشکداری د گەڕا ١٥ یا گەلەریا دهوک دا کریە. نوکە ژی هۆنەرمەند سامان کەریم مامۆستایە ل کۆلیژا ئەندازیاری ل زانکۆیا دهۆک.
بۆ داونلۆدکرنا وێنێن ب کوالتیا بلند، لینک ل خوارێ کلیک بکە:
https://drive.google.com/drive/folders/1CUOuAGRd2bN5kL70nB2brXGpi3yjM0rB?usp=sharing
ڕاگەهاندنا زانکۆیا دهۆك؛ ٢٤ـێ نیسانا ٢٠٢٤ـێ
تەڤژین الیاس ، عسمەت خابوور
فۆتۆ: عەلی بانکی