شاندەکێ بلندێ زانکۆیا دهۆک سەرەدانا زانکۆیا مووسل کر
Feb. 28, 2023, 6:48 p.m.

ب مەرەما نویکرن و بهێزترکرنا هەماهەنگی د ناڤبەرا زانکۆیا دهۆک و زانکۆیا مووسل دا و فراوانترکرنا بوارێن هەڤکاریێ و کارێ هەڤپشک، ئەڤرۆ رێکەڤتی ٢٣ـی شوباتا ٢٠٢٣، شاندەکێ بلندێ زانکۆیا دهۆک ب سەرۆکاتیا د. داود سلێمان ئەتروشی سەرۆکێ زانکۆیێ، سەرەدانا زانکۆیا مووسل کر و ژ لایێ د. قوسەی کەمالوددین ئەحمەدی سەرۆکێ زانکۆیا مووسل و ئەندامێن جڤاتا زانکۆیا ناڤبری هاتنە پێشوازیکرن.

د روینشتنەکێ دا و ب ئامادەبووونا هاریکارێن سەرۆکێ زانکۆیا دهۆک و راگرێن هژمارەکا کولیژان، دانوستاندن ل دۆر بهێزترکرنا هەماهەنگیێ و ئەنجامدانا کارێن هەڤپشک هاتە کرن، سەرۆکێ زانکۆیا مووسل ب گەرمی بخێرهاتنا شاندێ زانکۆیا دهۆک کر و باس ل دیرۆک و کەتوارێ زانکۆیا مووسل کر و ب تایبەتی وێرانکرنا زانکۆیا ناڤبری ب رێژا ٨٠٪ ژلایێ داعش ڤە، و ب "بەرلینا پشتی شەرێ جیهانیێ دووێ" سالۆخدا و باس ل هەولێن مەزنێن دووبارە ئاڤاکرنێ کر و گۆت "دهۆک پارێزگەهەکا گەلەکا هێژا و خۆشتڤیە ل دەف مە و زانکۆیا دهۆک ب نێزیکترین سازیا ئەکادیمی بۆ زانکۆیا مووسل دبینین و د هەر بوارەکی دا بۆ هەماهەنگی و پرۆژێن هەڤپشک بەرهەڤین. گەلەک سوپاس بۆ هەڤکاریا زانکۆیا دهۆک و هەلویستێن وە دگەل مە دا بۆ دووبارە ئاڤاکرنا ڤێ زانکۆیێ".

ژ لایێ خۆ ڤە سەرۆکێ زانکۆیا دهۆک د. داود ئەتروشی سوپاسیا سەرۆکێ زانکۆیا مووسل و ئەندامێن جڤاتا زانکۆیێ کر بۆ وێ پێشوازیا وان یا گەرم کر و باس ل دیرۆک و سیاسەت و کەتوارێ نوکە پلانێن پاشەرۆژی یێن زانکۆیا دهۆک کر و دیارکر "مە پەیوەندیێن دیرۆکی دگەل زانکۆیا مووسل هەنە و ستافێ ئەکادیمیێ زانکۆیا دهۆک باگراوەندەکێ ئەکادیمیێ گرنگ د زانکۆیا مووسل دا هەیە و پشتراستین ئەڤ پەیوەندیە دێ خزمەتا هەردوو زانکۆیان کەت".

پاشی شاندێ زانکۆیا دهۆک دگەل جڤاتا زانکۆیا مووسل گەریانەک د ناڤ زانکۆیا مووسل دا کر و سەرەدانا پەرتۆکخانا ناڤەندیا زانکۆیێ کر و شێوازێ نوی یێ ئاڤاکرنێ و پاشمایێن وێرانکاریێ دیتن، پاشی سەرەدانا هۆلا مەزنا شانۆیێ ل زانکۆیێ کر پشتی دووبارە هاتیە ئاڤاکرن، ل دویڤ دا سەرەدان بۆ تاقیگەهێن ئەندازیاری و پزیشکی کر بۆ فراوانکرنا مەودایێ پلانێن پاشەرۆژی یێن هەڤکاریێ.

هەژی ئاماژێ یە زانکۆیا مووسل ل سالا ١٩٦٧ـێ هاتیە دامەزراندن و ژ ٢٤ کولیژان پێکدهێت و نێزیکی ٧٠ هزار قوتابیان لێ دخوینن. نوکە ژی سێ کولیژێن زانکۆیا دهۆک هەماهەنگی و هەڤکاری دگەل کولیژێن زانکۆیا مووسل هەیە، ئەوژی کولیژێن زانستێن ئەندازیاریا چاندنێ، ڤێتێرنەری و زانست، و پلان هەنە ئەڤ هەماهەنگیە بهێتە فراوانکرن.

راگەهاندنا زانکۆیا دهۆک؛ ٢٣ـی شوبات ٢٠٢٣

عسمەت خابوور

فۆتۆ: محەمەد عەبدولکەریم