ب مەبەستا خزمەتکرنا گەنجا، و ب پاڵپشتیا رێکخراوا کاریتاس یا ئەڵمانی، و ب هەڤکاری ل گەل دەزگەهێ خێرخوازیێ بارزانی، گۆشا ئەمریکی و رێڤەبەریا تەکنەلۆژیا پێزانینا ل زانکۆیا دهۆک راهێنانەکا تەکنۆلۆژیایێ بۆ قوتابیێن قۆناغێن دوماهیێ و دەرچوویی ژ بسپۆرێن جودا ل ژێرناڤێ: ''كۆدینگ و بازارکرنا دیجیتاڵی بۆ گەنجا بۆ زێدەکرنا دەرفەتێن ڤەدیتنا کارى'' ل ٩ی تیرمەها ٢٠٢٣، ل ئاڤاهیێ پەرتووکخانا ناڤەندیا زانکۆیا دهۆک ئەنجام دا.
ئەڤ راهێنانە دێ ژ ٩ـی تیرمەهێ دەسپێبکەت و بڕیارە بۆ ماوێ ٣ هەیڤا بەردەوام بیت، و د هەر حەفتیێ دا بۆ ماوێ ٣ رۆژا. ژمارا پشكدارا نێزیكی ٢٠ کەسا یە ژ هەردوو رەگەزان.
مەبەستا سەرەکی ژ ئەنجامدانا ڤێ راهێنانێ فێرکرنا فێرخوازانە د شارەزایێن کودکرنێ و زمانێن بەرنامەسازیێ ب مەبەستا ب دەسڤەئینانا زانینێ بۆ دروستکرنا ئەپڵیکەیشنان کو کار ل سەر سیستەمێن هەمەجۆر یێن تەکنەلۆژی دکەت و ل گەل هەمی ئامیرێن وەک کۆمپیوتەر و موبایل و تابلێتا بگونجیت، ب رێکا فلاتەر کو وەك چارچوڤەكێ سەرچاوێ ڤەکری دهێتە هژمارتن یێ ژلایێ گۆگلی ڤە ھاتیە دامەزراندن. راهێنەر لورین سامی، کو بۆ ب رێڤەبرنا ڤێ ڕاهێنانێ ژ لایێ دەزگەهێ خێرخوازێ بارزانی ڤه هاتبوو دەست نیشانکرن، گۆت '' ئارمانجا مە ئەو نینە کو فێرخوازان ب لایەنێن تەکنولوژیایێ ب تنێ ئاشنا بکەین، بەلکو هاریکاریا وان بکەین بو هندێ ب تەمامی خۆ بۆ دەرفەتێن کاری و بازارکرنا کاری ئامادە بکەن. ئەو دێ فێری شارەزاییێن کارکرنا ب كۆمی و چارەسەرکرنا کێشەیا و چەوانیا گونجاندن ل گەل ژیانا بازرگانی دا بن پشتی ب دوماهی ئینانا خواندنێ". هەروەسا ئاماژە ب وێ چەندێ ژی کر، كو نابیت سەرنجا فێرخوازا ب تنێ ل سەر وان زانیاریێن زانستی بیت یێن کو ئەڤ ڕاهێنانە وان فێر دکەتێ؛ بەلكو پێدڤییە بەردەوام دیڤچوون بۆ پێشھات و پێشکەڤتنا د بوارێ تەکنولوژیایێ دا بکەن، چونکی بوارێ تەكنۆلۆژیایێ پیشەسازیەکا د ێشکەڤتنەکا بلەزدایە.
دیسان هۆنەر خدر دێوالی، قوتابی ل بەشێ جیۆلۆجی ل کۆلیژا زانست ل زانکۆیا دهۆک و ئێک ژ پشكدارێن ڤێ راهێنانا تەکنۆلۆژی دیارکر کو ئەڤ راهێنانە دەروازەیەكە فێرخوازی بەرەڤ جیهانا کودکرنێ ڤە دبەت. ھەروەكو ناڤبری دیاردكەت "بوارێ تەکنۆلۆژیا و پرۆگرامسازی کاریگەریەکا مەزن ھەیە. و بوارەکە بلەز پێش دکەڤیت، ئەم وەك گەنج پێدڤییە ئاستێ خۆ یێ هشیاربوونێ ژ لایێ تەکنولوژیایێ ڤە بلند بکەین بۆ هندێ کو رکابەریێ ل گەل گوهۆرینا جیهانا دەوروبەرێن خۆ بکەین''.
ژ لایێ خوڤە، مامۆستا مەحمود چاچان، رێڤەبەرێ گۆشا ئەمریکی – ل زانكۆیا دھۆك راگەهاند، کو ئەڤ راهێنانە ژ دوو بەرناما پێکدهێت، یێ ئێکێ کودکرنە کو نوكە یێ دەسپێکری، و یێ دی بازارکرنا دیجیتالی یە، کو دێ ل هەیڤا تەباخێ دەسپێکەت و بۆ ماوێ هەیڤەکێ ڤەکێشیت. دیسان ئاماژە ب وێ چەندێ ژی دا كو ''د راهێنانێ دا دێ فێرخواز فێری کودکرنێ بن ل سەر دارتێ کو زمانەکێ پرۆگرامسازی، پاشی دشێن ئەو کودێن وان دروستکرین ب پلاتفۆرمێ فلاتەری ڤە گرێدەن. پشتی ٣ هەیڤان ژ راهێنانان، پشكدار دێ تێگەهشتنەکا بنەرەتی ل دۆر پرۆگرامسازی و دارت و فلاتەرى هەبیت. و دێ شێن ئەو ب تنێ د خۆلێن ئۆنلاین یێن دی پشکدار بن، د بەرامبەر دا دێ شیانێن دروستکرنا ئەپلیکەیشنێن مۆبایل و تابلێت و کۆمپیوتەری هەبن. ئەڤە ژی هاریکارە د راکێشانا دەرفەتێن کاری بۆ گەنجا و دێ ئابوورێ نافخۆیی بەرەڤ باشتر ڤە بەت''.
ھەژی ئاماژەدانێ یە، پشكدارێن ڤێ راهێنان ل دویڤ پیڤەرێن دیارکری وەک رەھوانیا زمانێ ئینگلیزی و ئامادەبوونا بەردەوام و قۆناغا خواندنێ كو مەرجە یا دویماھیێ بیت یان قوتابی دەرچوویێ نوی بیت ھاتینە ھەلبژارتن.
راگەھاندنا زانكۆیا دھۆك؛ ١٠ـی تیرمەهێ ٢٠٢٣
راپۆرت: فاطمة محمود
وەرگێران: مێھڤان محەمەد سالح
فۆتۆ: محەمەد عەبدولكەریم