رۆژا چوارشەمبی رێكەڤتی 29ـی گولانێ 2024 وۆركشوپەك ب ناڤۆنیشانێ "دەستپێكەك دەربارەی تێگەھ و پرنسیپێن بیرتیژیا دەستكر" ب ئامادەبوونا ھژمارەكا زۆر یا مامۆستایێن زانكۆیا دھۆك ل ھۆلا پێشمەگە ل ناڤەندا قوتابیا ھاتە ئەنجامدان، كو وۆركشوپی تەكەز ل سەر تێگەھێن بیرتیژیا دەستكرد یێن سەرەكی و بكارئینانێن وێ و ھەژمارتنێن ئەخلاقی دكر.
ل دەستپێكێ روینشتنەك ژلایێ د. شھین عەبدولكەریم مامۆستا ل كۆلیژا زانست ھاتە برێڤەبرن، د روینشتنێ دا گەنگەشا بنەمایێن بیرتیژیا دەستكرد و بكارئینانێن وێ یێن جودا د بوارێن وەكو ئەندازیاریا تەلارسازی و ئابوور و ساخلەمیا گشتی و فێركرنێ و بكارئینانا ئەخلاقی بۆ ئالاڤێن بیرتیژیا دەستكرد د ڤەكۆلینێن ئەكادیمی و نڤێسینی دا ھاتە ئەنجامدان، د. شھین عەبدولكەریم تەكەز ل سەر چەوانیا شیانا بیرتیژیا دەستكرد د لاساییكرنا بیرتیژیا مرۆڤی دا كر، وەكو پرۆسێسێن سەرەكی د چارەسەركرنا داتایا و پێشئێخستنا ئەلگۆریتما و مەشقدانا نموونەیی.
ديسان د. ئەحمەد بەھیج یاسین بابەتەك ب ناڤونیشانێ "بیرتیژیا دەستكرد د ڤەكۆلین و بەلاڤكرنێ دا" پێشكێشكر، كو باس ل جوداھیێ د ناڤبەرا بیرتیژیا دەستكرد یا گشتی و بیرتیژیا دەستكرد یا بەرھەمئینانێ كر. ھەروەسا بكارئینانا ئەخلاقی بۆ بیرتیژیا دەستكرد د نڤێسینا ئەكادیمی دا دیاركر و تەكەز ل سەر گرنگیا چاڤدێریا مرۆڤی و روھنیێ كر، دیسان ئالاڤێن وەكو Semantic Scholar وScite.ai بۆ ھاریكاریكرنێ د پێداچوونا ئەدەبیاتیێن بابەتێن جودا دا پێشكێشكرن.
ژلایێ خۆڤە راگرێ كولیژا زانست، د. محەمەد عەزیز ئیبراھیم، باس ل "بیرتیژیا دەستكرد د فێركرنێ دا: بەلگە و كاریگەری" كر، كو سیستەمێن فێركرنا كەسایەتی یێن پالپشت ب بیرتیژیا دەستكرد و ھەلسەنگاندنا خۆبخۆیی و پلاندانانا بابەتا و ھاریكارێن گرێمانەیی نیشاندان، زێدەباری دیاركرنا پرۆگرامێن نوی وەكو یێن پالپشتیا ھەڤسوزی و سەربوورێن فێربوونا سەرپێھاتی و رێكارێن مایتێكرنا دەستپێكێ یا پشتبەستنێ ل سەر تەكنۆلۆژیا بیرتیژیا دەستكرد دكەت.
ل دویماھیا وۆركشوپی گەنگەشە ل دۆر مفا و دەرئەنجامێن پێشبینیكری یێن بیرتیژیا دەستكرد د سازیێن فێركرنێ دا ھاتە كرن، پشكدارێن وۆركشوپی تەكەز ل سەر گرنگیا ھەژمارتنێن ئەخلاقی و فێربوونا بەردەوام و گونجاندن ژلایێ مامۆستایا ڤە كر بۆ رەخساندنا شیانێن بیرتیژیا دەستكرد یێن تمام. دیسان كاریگەریا بیرتیژیا دەستكرد د بوارێن جودا و رۆلێ وی یێ سەرەكی د پاشەرۆژا فێركرنێ دا ھاتە دیاركرن.
بۆ داونلۆدکرنا وێنێن ب کوالتیا بلند، لینکێ ل خوارێ کلیک بکە:
https://drive.google.com/drive/folders/1SEMBuOINHTp25ZUWqh2JTpDo0zeq0gNO?usp=sharing
راگەھاندنا زانكۆیا دھۆك؛ ٢ـی خزیرانێ ٢٠٢٤
عسمەت خابوور و ماھر طاھر كێستەیی
وێنە: ریاض