كولیژا پەروەردا جەستەیی و زانستێن وەرزشی ل زانكۆیا دهۆك دێ وۆركشۆپەكێ ل رێکەڤری ٢٠٢٢/٣/٢٦ بۆ لایەنێن پەیوەندیارێن وەرزشا پارێزگەها دهۆكێ ئەنجامدەت، د ڤێ وۆركشۆپێ دا دێ دید و بۆچوون لێك هێنە گوهۆرین، بۆ دیاركرنا ئاریشێن بیاڤێ وەرزشێ و چارەكرنا وان ئاریشان و پێشخستنا وەرزشا پارێزگەهێ.
د. ئەحمەد قاسم راگرێ كولیژا پەروەردا جەستەیی و زانستێن وەرزشی ل زانكۆیا دهۆك دیاركر كو دڤی وۆركشۆپی دا هەمی لایەنێن پەیوەندیدار ب وەرزشا پارێزگەهێ ڤە دێ پشكداربن، وەكو ئێكەتیێن وەرزشی، لیژنا ئۆلومپی كو ٣٠ یاریێن وەرزشی بخۆڤەدگریت، هەروەسا چالاكیێن وەرزشی ل پەروەردا گشتی یا پارێزگەهێ، یانێن وەرزشی، رێڤەبەریا وەرزش و لاوان و كولیژا پەروەردا جەستەیی و زانستێن وەرزشی.
راگرێ كولیژا پەروەردا جەستەیی و زانستێن وەرزشی هەروەسا گۆت: "پێدڤیە ئەم وەكو ئەكادیمی د بیاڤێ وەرزشێ دا خۆ ژ بازنێن گرتی دەربێخین و بچینە د ناڤ وەرزشا دەڤەرێ دا، داکو بشێین خزمەتا وەرزشێ بكەین كو ئەڤە ئێك ژ ئارمانجێن مەیە وەكو كولیژا پەروەردا جەستەیی و زانستێن وەرزشی، بەلێ ڤێ یەکێ ژی پێدڤی ب كاركرنا هەمی لایەنێن گرێدایی وەرزشێ یە داكو دشیاندا بیت ئەڤ بیاڤە بهێتە پێشخستن".
لدۆر ناڤەرۆكا وۆركشۆپێ د. ئەحمەد قاسم دیاركر كو ئاریشێن دكەڤنە درێیا پێشكەڤتنا وەرزشێ دا، و گەلەك بابەتێن دیتر وەكو بابەتێ بازاركرنا وەرزشێ، كو بابەتەكێ گرنگە داكو پشتبەستنێ لسەر خۆ بكەن، و ئەو بخۆ مەزاختیان بۆخۆ پەیدابكەن، و ل دویماهیا هەر وۆركشۆپەكێ ژی دێ راپۆرتەكا کارگێری و ئێكا زانستی بۆ سەرۆكاتیا زانكۆیێ هێنە بلندكرن وەكو راسپارد بۆ پێشخستنا وەرزشا پارێزگەهێ.
ژ لایەکێ دی ڤە، د. ئەحمەد قاسم ئاشكراكر كو د پلانا كولیژا پەروەردا جەستەیی و زانستێن وەرزشی دایە گەلەك كاران بۆ وەرزشا پارێزگەهێ بكەت و گۆت: " نوكە ل كوردستانێ و عیراقێ هەمیێ ماستەر د بیاڤێ وەرزشێ دا نەكریە تایبەتمەندی، بەلێ مە ل كولیژا پەروەردا جەستەیی و زانستێن وەرزشی ل زانكۆیا دهۆك بتنێ كریە تایبەتمەندی، و هەمی ژی هەڤبیرن كو یا دروست ئەوە، بەلێ ئەوێن دی چاڤ لمە ناكەن، بێی كو ئەگەران بزانین، پشتی مە رازیبوونا سەرۆكاتیا زانكۆیێ و وەزارەتا خواندنا بلند وەرگرتی مە كریە تایبەتمەندی، و مە دڤێت ئەم پشكێن زانستی ڤەكەین كو ل گەلەك جهان هەیە دەرچوو، ڤەكۆلەر یان مامۆستا یان راهێنەر بیت، كو نوكە هەمی وەكو ئێك دەردچن، ئەڤجا پاشی بەرەڤ تایبەتمەندیێ دچن، نوكە ئەم كاری لسەر وێ چەندێ دكەین پشكێن زانستی بهێنە ڤەكرن كو خزمەتا وەرزشا دەڤەرێ پتر بكەین، و لدویڤ بازارێ وەرزشێ مە دەرچوو هەبن".