سەرۆکێ زانکۆیا دهۆک: "خزمەت و ماندیبوونا چەند سالان و د کاودانێن دژوار و بەرتەنگ دا یا د. ئەحمەد محەمەد سالح و د. مێڤان عارف بۆ زانکۆیا دهۆک کری سەربلندی شانازی یە، و چ جارا ناهێتە ژبیرکرن".
ل رۆژا ئێکشەمبی، ڕێکەڤتی 2022/10/24، ل سەرۆکاتیا زانکۆیا دهۆک، ب ئامادەبوونا د. داود سلێمان ئەتروشی سەرۆکێ زانکۆیا دهۆک، و هژمارەکا رێڤەبەر و فەرمانبەرێن سەرۆکاتیا زانکۆیا دهۆک، د رێورەسمەکی ژ هەژی دا، د. دلشاد عبدولجەبار حەلیم ل جهێ د. ئەحمەد محەمەد سالح وەکو هاریکارێ سەرۆکێ زانکۆیێ بۆ کاروبارێن کارگێری و دارایی و د. نەبەز ئیبراهیم محەمەد ل جهێ د. مێڤان عارف وەکو هاریکارێ سەرۆکێ زانکۆیێ بۆ کاروبارێن قوتابیان دەستبکاربوون.
د رێورەسمێن ئالۆگۆرکرنا پۆستێن هاریکارێن سەرۆکێ زانکۆیێ دا، سەرۆکێ زانکۆیا دهۆک گۆتارەک پێشکێشکر و راگەهاند: "ژ بەر گرنگی و هژمارا زۆرا پۆستان، پرۆسەیا ئالۆگۆرکرنا پۆستێن هاریکارێن سەرۆکێ زانکۆیێ و راگرێن کولیژا دەمەکێ زۆر ڤەکێشا". هەروەسا سەرۆکێ زانکۆیێ د گۆتارا خۆ دا پەسنا رۆلێ هەردوو هاریکارێن سەرۆکێ زانکۆیێ کر و گۆت" پەسنا رۆل و خزمەت و ماندیبوونا د. ئەحمەد محەمەد سالح ناهێتە کرن ژ بەر وێ خزمەتا زۆر یا چەندین سالا بۆ زانکۆیا دهۆک کری، ژ بەر ڤێ چەندێ زانکۆیا دهۆک شانازیێ ب کەسێن وەکو دکتۆری".
هەروەسا سەرۆکێ زانکۆیێ د درێژیا گۆتارا خۆ دا، پەسنا رۆل و خزمەتا زۆر یا د. مێڤان عارف کر و دیارکر "د. مێڤان کورێ زانکۆیا دهۆکە، ژبەرکو هەر ژ خواندنا خۆ یا زانکۆیێ و تاکو بوویە هاریکارێ سەرۆکێ زانکۆیێ خزمەتا زانکۆیا دهۆک کریە، و گەلەک یێ سەرکەڤتی بوو د وان بەرپرسیارەتیێن ل زانکۆیا دهۆکێ پێ دهاتنە راسپاردن، ژ بەر ڤێ چەندێ کەسێن چالاک و سەرکەڤتیێن وەکو د. مێڤان جهێ سەربلندیا مەنە".
ل دویماهیا گۆتارا خۆ، د. داودی گۆت" گوهۆرین پرۆسەکە گەلەک نۆرمال و ئاسایی یە، ب تایبەتی د کارگێریێ دا، ژبەر ڤێ چەندێ بۆ زێدەتر پێشخستن و پێشڤەبرنا ئاستێ زانستیێ زانکۆیا دهۆک ب بەردەوامێ پرۆسەیا ئالۆگورکرنا پۆستان دێ هێتەکرن و ئەڤ پڕۆسەیە ب دویماهی ناهێت، خزمەت و ماندیبوونا چەندین سالان یان ڤان کەسێن هێژا د کاودانێن دژوار و قەیرانان دا هەمی دەمان جهێ شانازیێ یە بۆ مە".
پاشی ب گولان دەربرین ژ سوپاسداریێ بۆ هەردوو هاریکارێن بۆری یێن سەرۆکێ زانکۆیا دهۆک هاتە کرن و هەروەسا سەرۆکێ زانکۆیێ و هەردوو هاریکارێن بۆری ب هەمی جوانی و راستگۆیی پیرۆزباهیا هەردوو هاریکارێن نوی یێن سەرۆکێ کر و ژ دل سەرکەڤتن بۆ خواست.