ب هه‌لكه‌ڤتا ده‌ستپێكرنا سالا نوی یا خواندنێ (٢٠٢٢-٢٠٢٣)، ب ناڤێ خۆ و جڤاتا زانكۆیێ پیرۆزباهیه‌كا گه‌‌رم ل سه‌رجه‌م قوتابی و مامۆستا و فه‌رمانبه‌رێن زانكۆیا دهۆك دكه‌م و هیڤیدارم ساله‌كا به‌رهه‌مدار و پڕ سه‌ركه‌ڤتن بیت و ب کەد ماندیبوون و هەڤکاریا هەوەیێن رێزدار ل به‌رامبه‌ر هه‌می هەڤڕکی و بەربەستێن دهێنه د رێكا مه دا رابوەستین.
د سالا بۆری دا، كارەکێ چڕ بۆ پێشڤه‌برنا زانكۆیا دهۆک هاتە کرن، و دیار بوو کو لبه‌رچاڤ وه‌رگرتنا به‌رژه‌وه‌ندیا گشتی د بڕیاران دا پێدڤیه‌كا نوكه‌یی یه، سەرەرای هندێ کو ئه‌ڤ كاره بێی هەڤڕکی و به‌رهنگاری نه‌بووینه و نابن. د سالا نوی یا خواندنێ دا، هه‌وه هه‌میان پشتراست دكه‌ین كو ئه‌ڤ هه‌وله دێ به‌رده‌وام بن بۆ باشتركرنا ره‌وشا قوتابیان ب رێكا دروستكرنا ژینگه‌هه‌كا ئارامتر و باشتر ل كه‌مپێن زانكۆیێ و هه‌روه‌سا دویڤچوون و چاره‌سه‌ركرنا ئاریشێن وان، و پشته‌ڤانیا مامۆستایان د كارێ وان یێ ئه‌كادیمیێ پیرۆز و جێبه‌جێكرنا پێڤاژۆیا بۆلۆنیا دا، و گرنگیدان ب بكارئینانا سیسته‌مێن ئه‌له‌كترۆنی د رێڤه‌برنا كارێن كارگێری و راهێنانا فه‌رمانبه‌ران دا. ئه‌ڤ كاره پێدڤی ب پشته‌ڤانی، و تێگه‌هشتن و بێهنفره‌هیا هه‌می لایه‌نه‌كی هه‌یه.
دەستپێکرنێن رژد و گەشبین و پڕی هیڤی، گوهۆرینێن مەزن دروست دکەت. هیڤیدارم ڤێ سالا نوی یا خواندنێ ب هیڤیێن نوی و هزرێن پۆزەتیڤ و گەشبین دەستپێبکەین بۆ هندێ پاشەرۆژەکا باشتر و گەشتر دروست بکەین. ب کارکرن و ماندیبوونێ مرۆڤ ئاڤا دبن، و مرۆڤێن ئاڤا، وەلاتان ئاڤادکەن.
هەلبەت رێڤه‌برنا زانكۆیێ ب شێوازه‌كێ ساخلەم بۆ پێگه‌هاندنا نڤشه‌كێ خودان زانین و كارامه‌یی و شیانێن به‌رز، پێدڤی ب پالپشتی و پشته‌ڤانیا هه‌می لایه‌نه‌كی هه‌یه ل ناڤ و ده‌رڤه‌ی زانكۆیێ.
ل دوماهیێ، سوپاس بۆ هەوە هەمیا و هەروەسا بۆ هه‌می لایه‌نێن ل گه‌ل زانكۆیێ هاریكار و پشتەڤان و هەروەسا وان لایەنێن مه ل كوردستانێ دپارێزن.
پ.هـ.د. داود سلێمان ئه‌تروشی
سه‌رۆكێ زانكۆیا دهۆك
٤-٩-٢٠٢٢