ڕاگەهاندنا زانکۆیا دهۆک؛ ١٥ـی چریا ئێکێ ٢٠٢٢
ب هاریکاریا سەرۆکاتیا زانکۆیا دهۆک و کۆمپانیا هونور ل عیراقێ، کوژیێ چینی ل زانکۆیا دهۆک هاتەڤەکرن.
ئەڤڕۆ ل پەرتۆکخانا ناڤەندی ل کەمپا زانکۆیا دهۆک، ب ئامادەبوونا (نی روچی) قونسلێ کۆمارا چینێ لە هەولێرێ و هەردوو هاریکارێن سەرۆکێ زانکۆیا دهۆک د. ئەحمەد محەمەد سالح، و د لقمان هادی حەسەن و د. دیلان روستەم شیرەتکارێ سەرۆکێ زانکۆیا دهۆک و رێڤەبەڕێ کۆمپانیا هونور ل عیراقێ، کوژیێ چینی ل زانکۆیا دهۆک هاتەڤەکرن.
ل دەستپێکا رێورەسمان کو کچەکا کورد و گەنجەکێ چینی رێورەسم بڕێڤەدبرن، گەنجێ چینی ب زمانێ چینی و پاشی کچا کورد ژی ب زمانێ کوردی بخێرهاتنا مێڤانان کر و داخواز ژ د. ئەحمەد محەمەد سالح، هاریکارێ سەرۆکێ زانکۆیا دهۆک کر کو گۆتارا خۆ پێکێشبکەت.
پاشی د. ئەحمەدی خۆشحالیا خۆ ب ڤەکرنا کوژیێ چینی ل زانکۆیا دهۆک دیار کر و گۆت "دەرگەهێ زانکۆیا دهۆکێ بۆ ئەنجامدانا هەر چالاکیەکێ دگەل زانکۆیێن هەرێما کوردستانێ و زانکۆیێن جیهانێ یێ ڤەکریە"، هەروەسا هیڤی خواست کو ئەڤ کارێ هەڤپشک دناڤبەرا زانکۆیا دهۆک و ژۆرا کەلتۆری ل قونسلخانەیا چینێ ببیتە دەرگەهەک بۆ پتر پێشڤەبرنا ئاستێ زانستی و پەیداکرنا دەلیڤێن زێدەتر بۆ قوتابیێن هەرێما کوردستانێ ل وەلاتێ چینێ".
ل دویڤ دا، داخواز ژ قونسولێ کۆمارا چینێ کر کو گۆتارەکێ ب هەلکەڤتا ڤەکرنا کوژیێ چینێ ل زانکۆیا دهۆک پشکێشبکەت، نی روچی ب "چونی باشی" دەست ب گۆتارا خۆ کر و گۆت "زۆرێ کەیفخۆشم ل دەستپێکا وەرزێ نویێ خواندنێ سەرەدانا زانکۆیا دهۆک کریە، هەر ل دەستپێکا هاتنا من بۆ ناڤ کەمپا زانکۆیا دهۆک من هەست پێکر کو زانکۆیەکا ئەکادیمیە و گرنگیەکا مەزن ب قوتابیێن خۆ ددەت، هەروەسا ئەز وەسا دبینم کو زانکۆیا دهۆک ژێدەرەکێ گرنگ و سەرەکیێ پێدانا پێزانینانە بۆ قوتابیێن خۆ، ئەڤ چەندەژی دبیتە ئەگەرێ وێ چەندێ کو قوتابیێن زانکۆیا دهۆک رۆلەکێ گرنگ دێ د پێشڤەبرنا جڤاکی دا هەبیت".
د درێژیا گۆتارا خۆ دا قونسلێ چینێ دیارکر "پشتی ل مەها نیسانا بۆری د. داود سلێمان ئەتروشی سەرۆکێ زانکۆیا دهۆک سەرەدانا قونسلخانەیا وەلاتێ چینێ ل هەولێرێ کری و پشتێ گۆتوبێژەکا تێروتەسەل هاتیەکرن، مە ب هەڤپشکی دگەل ژۆرا کەلتۆری یا چینێ بریارا ڤەکرنا کوژیێ چینێ ل زانکۆیا دهۆکێ دا، ئەم ب باوەرین ئەڤ کارێ مەیێ هەڤپشک دێ خزمەتەکا مەزن د پێشڤەبرنا پەیوەندیێن کەلتۆری و زانستی دا هەبیت بۆ گەلێ چینێ و هەرێما کوردستانێ".
پاشی سەرۆکێ پشکا زمانێ چینێ ل زانکۆیا سەلاحەدین د پێشکێشکرنا گۆتارا خۆ دا گەلەک ب رژدی باس ل گرنگیا پشکا زمانێ چینی کر و هیڤی خواست د داهاتی دا ل زانکۆیا دهۆک ژی پشکا زمانێ چینی بهێتە ڤەکرن و دەلیڤە ب قوتابیێن زانکۆیا دهۆک بهێتە دان ل زانکۆیێن وەلاتێ چینێ خواندنا خۆ یا بلند تمام بکەن.
د بەردەوامیا رێورەسمێن ڤەکرنا کوژیێ چینی دا، ئەوێن ل ١٢ـی چریا ئێکێ ٢٠٢٢ ل پەرتۆکخانا ناڤەندی ل زانکۆیا دهۆک هاتینە گێڕان، چەندین چالاکی هاتنە ئەنجامدان، هاریکارێ سەرۆکێ زانکۆیا دهۆکێ تابلۆیەکێ تایبەت ب باژێڕێ دهۆکێ پێشکێشی قونسلێ وەلاتێ چینێ کر، پاشی ئێک ژ ئەندامێن ژۆرا کەلتۆری یا چینی ب نمایشەکا کاراتێ و ژەنینا ئامیرێ شمشالێ و گۆتنا چەند سترانا بەردەوامی دا چالاکیێ.
هەروەسا (دی بۆ ژانگ) رێڤەبەرێ کۆمپانیا هونور ل عیراقێ، کو ب ئەرکێ رێڤەبرنا ئەڤان رێورەسمان و ڤەکرنا کوژیێ چینی ل زانکۆیا دهۆکێ رابوویە، چەندین ئۆفەر بۆ قوتابیێن زانکۆیا دهۆک راگەهاندن ل دەمێ کرینا هەر موبایلەکا کۆمپانیا هونور، ئەڤ چەندەژی بۆ جهێ دلخۆشیا قوتابیێن زانکۆیا دهۆک.
ل دویماهیا رێورەسمان، ئامادەبوویان سەرەدانا کوژیێ چینی کر کو ژلایێ ژۆرا کەلتۆری یا چینێ ڤە هاتبوو رێکخستن ب کەلوپەلێن تایبەت ب کەلتۆر و دابونەریت و خوارنێن چینی، و ب هویری هەمی پشکێن کوژیێ چینی ژ لایێ رێڤەبەڕێ کۆمپانیا هونور ڤە هاتنە باسکرن و چەند دیاری ژلایێ قونسلێ چینێ ب قوتابیێن زانکۆیا دهۆک هاتنە پێشکێشکرن.