ل رۆژا پێنجشەمبی رێکەڤتی ٢٠٢٢/١١/٣ ل پشکا زمانی کوردی یا کولیژا زمانان ل زانکۆیا دهۆک، گەنگەشا نامەیا دکتۆرایێ یا ڤەکۆلەر (گولستان بدل محمد حسن)، ل ژێر ناڤونيشانێ "پراکتیزەکرنا تیۆریا (جاک لاکان)ـی د کورتە چیرۆکێن (فازل عومەر و عسمەت محەمەد بەدەل)دا" ب سەرکەڤتیانە هاتە ئەنجامدان.
ناڤەرۆكا ڤەكۆلینێ دناڤداچوونەكا ھویر و ھەمەلایەنا تیۆریا دەروونشیكاری یا دەروونشیكارێ فرەنسی (جاك لاكان 1901-1981)ی و پراكتیزەكرنا بنەمایێن وێ ل سەر كورتە چیرۆكێن (فازل عومەر و عسمەت محەمەد بەدەل)ـی یە .ئەڤ ڤەكۆلینە ژ دەرازینك و سێ پشك و ئەنجام و لیستا ژێدەران پێكدھێت.
دەرازینك پێداچوونەكا گشتی و پوختە ل دۆر ھێلێن پێكگەھشتنا ئەدەب و زانستێ دەروونشیكاری. پشكائێكێ ناساندنا (جاك لاكان)ی وبەرژەنگێن تیۆریا وی دبیاڤێ رەخنا دەروونشیكاریداوخواندنا وی بۆ كورتە چیرۆكێ. پشكادووێ ژی، پشكەكا تیۆری و پراكتیكیە، ژ لایێ تیۆری ڤە باس ل بنەما و تایبەتمەندیێن ھەر سێ سیستەمێن پێكھاتا وەرارا دەروونی یا مرۆڤی ل ھەر سێ سیستەمێن (خەیالی، ھێمای و كەتواری) دكەت و ل سەر نموونێن كورتە چیرۆكێن ناڤبری پراكتیزە دبن. د پشكا سێیێ دا، تێگەھێن سەرەكی یێن تیۆریا (لاكان)ـی ب ئاوایەكێ تیۆری و پراكتیكی ھاتینە باسكرن.
ڤەکۆلەرا ڤێ ناما دکتۆرایێ، باس ل تیۆریا (جاك لاكان)ی کر و گۆت" تیۆریا (جاك لاكان)ـی تیۆریەكا دەروونشیكاریە ل ژێر ناڤونیشانێ (تیۆریا سیستەمێ سێیانی) جھێ خۆ د ڤەكۆلینێن رەخنا ئەدەبی دا گرتیە. ئەڤ تیۆریە ژ سێ سیستەمان پێکدهێت، ئەوژی (خەیالی، ھێمای و كەتواری)، بناغێ وێ ل سەر كۆمەكا تیۆریێن فەلسەفی، زانستی و زمانڤانی یە و ل ژێر درویشمێ (ڤەگەریان بۆ فروید)ـی ب ئاوایەكێ داھێنەرانە ئاڤابوویە. تایبەتمەندیا ئەڤێ تیۆریێ ب ڤەگوھازتنا رێرەوێ خواندنا رەھەندێ دەروونیێ تێكستێ ئەدەبی ژ جەمسەرێ نڤیسەری بۆ جەمسەرێ تێكستی بەرجەستە دبیت. ژ ئەڤێ روانگێ ڤە (لاكان) ب بنیاتنەرێ قۆناغا نویا دەروونشیكاریا ئەدەبی دھێتە نیاسین". هەروەسا ڤەکۆلەری د ڤەکۆلینا خۆ دا رێبازا دەروونی ل دویڤ بنەمایێن تیۆریا دەروونشیكاریا (جاك لاكان) بکارئینایە.
دەربارەی هەلبژارتنا کورتە چیرۆکێ بۆ ناما دکتۆرایێ، ڤەکۆلەرێ دیارکر "كورتە چیرۆك وەك جۆرەكێ ئەدەبی و ب تایبەتی كورتە چیرۆكا (نامەیا ھاتیە دزین) یا (ئێدگار ئالان پۆ)ی ئەو بیاڤ بوویە كو (لاكان)ـی تیۆریا خۆ ل سەر پراكتیزە كری، چونكە ئەو زمانێ ھێمایێ چیرۆكا ناڤبری پێ ھاتیە نڤیسین د خزمەتا پراكتیزەكرنا بنەمایێن تیۆریا وی دا بوویە.
هەژی گۆتنێ یە د ڤێ ڤەکۆلینێ دا کورتە چیرۆکێن فازل عومەر و عسمەت محمد بەدەل ووینە میناکێن ڤەکۆلینێ، دەربارەی ڤێ چەندێ ژی ڤەکۆلەرێ گۆت "ھەلبژارتنا كورتە چیرۆكێن (فازل عومەر) و (عسمە ت محەمەد بەدەل)ی نە بۆ كارەكێ بەراوردكاری بوویە، ئەڤە ژلایەكی، ژلایەكێ دی ڤە تایبەتمەندیا زمانێ كورتە چیرۆكان فاكتەرێ سەرەكیێ ھەلبژارتنا ئەوان وەك كەرەستێ پراكتیكی بوویە چونكە شیایە رۆناھیێ بێخیتە سەر رەھەندێ دەروونیێ كەسایەتیان و زەمینەیا پراكتیزەكرنا گشت تێگەھـ و بنەمایێن تیۆریا (لاكان) بەرھەڤ بكەت، یا گرنگتر ژی، تیۆریا (لاكان)ـی ب خۆ ژی ل سەر كورتە چیرۆكێ پراكتیزە بوویە.
د ڤەکۆلینا خۆ دا، ڤەکۆلەر گەهشتیە وی ئەنجامی کو چەندی و چاواییا بەرچاڤكرنا دۆخێ دەروونیێ كەسایەتیان د كورتە چیرۆكێن ھەردوو چیرۆكنڤیسان دا، بیاڤێن گونجای یێن كارێ شرۆڤەكاریا تیۆریا سیستەمێ سێیانیێ (لاكان)ـی بووینە، ب تایبەت رەنگڤەدانا ئەوان ل سەر نەخشەیێ (گرێیا بورمۆ) ئەوێ تایبەتمەندیا پێکڤە گرێدانا زنجیرەیا سیستەمێن تیۆریا (لاكان)ـێ دەستنیشان دكەت.
هەژی ئاماژێ یە کو لیژنا ڤێ ڤەکۆلینێ ب سەرۆکاتیا پ.د. هیمداد حسین بەکر بوو، و ب ئەندامەتیا هەر ئێک ژ پ.د. حسێن عثمان عبدالرحمن، پ.هـ.د. دەریا جەمال حەوێز، پ.هـ.د. محسن عارف صالح و پ.هـ.د. نفیسە اسماعیل حاجی وەکو ئەندام و سەرپەرشت.