وەزارەتا خواندنا بلند و ڤەكۆلینێن زانستی یا حكومەتا ھەرێما كوردستانێ پێنگاڤێن مەزن ھاڤێتینە د پەرەپێدانا ھەڤپشكیێن ئەكادیمی یێن ناڤدەولەتی ل كۆنفرانس و پیشانگەھا NAFSA 2024 یا سالانە، شاندێ وەزارەتێ ب ئەندامەتیا راوێژكارێن وەزارەتێ و ژمارەكا سەرۆك زانكۆیا ژ وان سەرۆكێ زانكۆیا دھۆك د. داود سلێمان ئەتروشی پشكداری د كۆمبوونێن گرنگ و بەرھەمدار و گەنگەشێن ستراتیژی كر ب ئارمانجا پەرەپێدانا لێكگوھۆرینێن فێركرن و ھەڤكاریا جیھانی.
كۆمبوونێن ستراتیژب و ئەنجامێن سەرەكی:
د. داود سلێمان ئەتروشی كۆمبوونێن گرنگ ل گەل نوینەرێن زانكۆیێن ئەمریكی و ئیتالی و پۆلەندی ئەنجامدان، گەنگەشێن ڤان كۆمبوونا تەكەز ل سەر پێكئینانا پەیوەندیێن ناڤدەولەتی یێن بھێزتر ژلایێ زانكۆیا دھۆك دكر، ل گەل تەكەزكرن ل سەر دەستپێشخەریێن ڤەكۆلینا ھەڤكاری و بەرنامێن لێكگوھۆرینا قوتابیا و ھەڤپشكیێن ئەكادیمی، ئەڤ ھەولە ژی ب مەرەما دابینكرنا دەلیڤێن مەزنتر بۆ زانكۆیا دھۆك و قوتابیێن وێ دھێنە مەزاختن.
زێدەباری ڤێ چەندێ، شاندێ ناڤبری ھەڤدیتن ل گەل د. فانتا ئوو، سەرۆكا NAFSA ئەنجامدا بۆ گەنگەشەكرنا گرنگیا رۆلێ ھەرێما كوردستانێ د كەرتێ فێركرنا جیھانی دا، دیسان دانوستاندنا تەكەز ل سەر بەرفرەھكرنا ھەڤكاریا ئەكادیمی و لێكگوھۆرینا قوتابیا و ئەندامێن دەستەیا وانەگوتنێ و پرۆژێن ھەڤشك و پێشئێخستنا بابەتێن خواندنێ كر.
دیارترین چالاكیێن كونفرانسی:
كونفرانس و پیشانگەھا NAFSA 2024 یا سالانە، یاكو د ماوێ د ناڤبەرا 28 تا 31ـی گولانێ ھاتیە ئەنجامدان، كار و چالاكیێن گشتگیر بخۆڤەگرتن كو گوتارێن سەرەكی و دەلیڤێن پەیوەندیكرنێ و روینشتنێن تایبەتمەند بوون:
- روینشتنا گشتی یا دەستپێكێ: كۆنفرانس ب پەیڤەكا سەرەكی دەستپێكر كو ژ لایێ لویس فون ئاھن، سەرۆكێ جێبەجێكار یێ كومپانیا Duolingo ڤە ھاتە پێشكێشكرن كو شێوەیێ دیتنا ئەڤێ رویدانا گرنگ دەستنیشانكر
- كۆمەلا بەرژەوەندیێن رۆژھەلاتا ناڤین MEIG: ل 28ـی گولانێ، شاندێ وەزارەتا خواندنا بلند یا حكومەتا ھەرێما كوردستانێ پشكداری د ڤێ روینشتنێ دا كر، بۆ ڤەدیتنا لێكگوھۆرینا فێركرنێ ل گەل سازیێن رۆژھەلاتا ناڤین و باكورێ ئەفریقیا.
- سمینار ل دۆر سەركردایەتیێ: د ڤێ روینشتنێ دا پەیڤەكا سەرەكی ھاتە پێشكێشكرن دیسان گەنگەشە د روینشتنەكا بازنەیی دا ھاتنە ئەنجامدان، كو تێروانینەك ل دۆر سەركردایەتیێ د فێركرنا ناڤدەولەتی دا بۆ شاندێ وەزارەتا خواندنا بلند بدەستڤەئینا زێدەباری دەلیڤێن پەیوەندیكرنێ ل گەل مەزنە بەرپرسێن ناڤدەولەتی و سەركردێن فێركرنێ.
- دانوستاندنا جڤاكی فێركرنێ: شاندێ وەزارەتا خواندنا بلند پشكداری د روینشتنەكا جڤاكێ زانینێ یێ سەركردایەتیكرنا فێركرنا ناڤدەولەتی دا كر و شیا نویكرنێن بھادار و ژێدەر و دەلیڤێن پەیوەندیكرنێ ب دەستخۆڤە بینیت.
پەرەپێدانا پەیوەندیێن ئەكادیمی:
د كۆمبوونەكا گرنگدا ل گەل نوینەرێن زانكۆیا فاندربیلت، شاندێ ناڤبری گەنگەشا دەلیڤێن خواندنێ و پرۆژێن ھەڤپشك كر، دیسان دووپاتی ل سەر تێكەلكرنا ئارمانجێن نەتەوەیێن ئێكگرتی بۆ گەشەپێدانا بەردەوام د ستراتیجییەتا بابەتێن خواندنێ یێن زانكۆیێن كوردستانێ دا كر، دیسان پشكداریكرنێن زێدتر ل گەل زانكۆیا ویلایەتا ئاریزونا و دكتۆر حەسدەر جەواد ئەلقودس، راوێژكارێ رەوشەنبیری ل بالیۆزخانا عیراقی پەرەپێدانا پێگیریا ب كۆم بۆ پەرەپێدانا خواندنا بلند ل ھەرێما كوردستانێ كر.
ئاسویێن پاشەرۆژێ:
پشكداریكرنا شاندێ وەزارەتا خواندنا بلند یا حكومەتا ھەرێما كوردستانێ و پشكداریكرنا سەرۆكێ زانكۆیا دھۆك، د. داود ئەتروشی د كونفرانس و پیشانگەھا NAFSA 2024 یا سالانە پێنگاڤەكا ئێكلاكەرە د ئاڤاكرنا پرەكا ئەكادیمی یا بھێز د ناڤبەرا ھە رێما كوردستانێ و ویلایەتێن ئێكگرتی یێن ئەمریكا، دھێتە پێشبینیكرن كو گەنگەشە و رێككەڤتن و لێكتێگەھشتنێن ب رێكا كۆنفرانسێ ناڤبری ب دەستڤە ھاتین مفایێن زۆر ھەبن، ژ وان ژی پەرەپێدانا دەلیڤا بۆ قوتابیا و پەرەپێدانا ھەڤكاریا ئەكادیمی.
پشكداریكرنا شاندێ وەزارەتا خواندنا بلند یا حكومەتا ھەرێما كوردستانێ یا چالاك د كۆنفرانس و پیشانگەھا NAFSA 2024 رەنگڤەدانا رژدیا حكومەتا ھەرێما كوردستانێ دكەت بۆ بەرزكرنا ئاستێ خواندنا بلند و ڤەكۆلینا زانستی، دیسان ئەڤ پشكداریە زەمینەسازیە بۆ ھەڤپشكیێن ناڤدەولەتی یێن پاشەرۆژێ و پێشڤەچوونا فێركرنێ.
راگەھاندنا زانكۆیا دھۆك؛ ٢ـی خزیرانێ ٢٠٢٤
عسمەت خابوور و ماھر طاھر كێستەیی