ل زانكۆیا دهۆك كۆنفرانسەكێ نێڤدەولەتی ل دۆر جینۆسایدێ هاتە ئەنجام دان

سەنتەرێ بێشكچی بۆ ڤەكۆلینێن مرۆڤایەتی ب هەڤكارییا سەنتەرێ ڤەكۆلینێن جینۆسایدێ ل زانكۆیا دهۆك كۆنفرانسێ نێڤدەولەتیێ دووێ ل دۆر جینۆسایدێ ل رۆژا 27/1/2021 ل هۆلا كونفرانسان ئەنجام دا.
د رێورەسمێن كۆنفرانسی دا كو ب شێوێ‌ ئەنلاین و هەروەسا ئامادەبوون ژی هاتبوو ئەنجام دان، سەرۆكێ‌ زانكۆیا دهۆك پ. د. مصلح دهۆكی د پەیڤەكی دا گۆت ئەڤ دەڤەرا ئەم تێدا دژین ئەوا دبێژنێ‌ رۆژهەلاتا ناڤین، هەردەم دەڤەرا هەڤركی و ململانێ‌ و ئێكلاكرنا بەرژەوەندیان بوویە، ب تایبەتی ژی عیراق كو پارچەكە ژ ڤێ‌ دەڤەرێ‌، هەر ژ دامەزراندنا وێ‌ و هەتا نوكە ب كوشتن و مالوێران كرن و دەربەدەریێ‌ خەلكێ‌ وێ‌ بوویە قوربانی سیاسەتێن رژێمێن وێ‌، ب تایبەت ژی ئەم كورد، چونكو چێبوونا دەولەتا عیراقێ‌ ل سەر بناغەكێ‌ نەیێ‌ ساخلەم هاتیە ئاڤاكرن، و ئەگەر بناغە یێ‌ ساخلەم و خورستی نەبیت، ئەنجام دێ‌ قركرن و جینوساید و ئەنفال و دەربەدەری و داعش و كوشتنا بەردەوام بیت.
پ. د. مصلح دهۆكی د برگەكا دیتر یا پەیڤا خۆدا گۆت دەستهەلاتدارێن دەولەتا عیراقێ‌ هەر ژ دامەزراندنێ‌ چ جاران كورد وەكو وەلاتیێن خۆ نەهژمارتینە، د عیراقا سەدێ‌ بۆری دا مرۆڤێ‌ كود وەكو تاقیگەه هاتیە بكارئینان، تێست و تاقیكرنێن چەكی ب كوردان هاتینە كرن، هەمی درندەی و هۆڤاتیێن خۆ ب دژی گەلێ‌ كورد بكارئینایە، سەر ڤێ‌ هەمیێ‌ را دلێ‌ دوژمنان رحەت نەبوویە، هەتا گەهشتیە بكارئینانا چەكێ‌ كیمیایی ب دژی گەلێ‌ مە، هەتا نوكە ژی شینوار و ڤەرێژێن ڤان برین و نەخۆشیان هێشتا ل نك گەلەك كەسان دناڤا جڤاكێ‌ مەدا یێن ماین و برینێن وان نەهاتینە سارێژ كرن.
سەرۆكێ‌ زانكۆیا دهۆك دیسا گۆت زانكۆیا دهۆك بزاڤێن وێ‌ هەردەم ئەون ژلایێ‌ ئەكادیمی و زانستی ڤە پاشترین خزمەتان پێشكێش بكەت، هەروەسا ژ لایێ‌ پەیوەندی و گێرانا چالاكیێن ژ ڤی رەنگی ژی هەردەم خۆ ل رێزێن پێشیێ‌ دیتیە بۆ ژێگرتنا بابەتێن گرنگ، گێرانا ڤی كۆنفرانسێ‌ نێڤدەولەتی ژی ئێك ژ ڤان پێشەنگیانە، هیڤیا مە ئەوە د ڤان دوو روژان دا بشێین پەیاما ڤی كۆنفرانسی بگەهینین و ئەنجام و راسپاردان بۆ لایەنێن پەیوەندیدار ئاراستە بكەین.
رێڤەبەرێ‌ سەنتەرێ بێشكچی بۆ ڤەكۆلینێن مرۆڤایەتی د. نەشوان شكری دیاركر كو كۆنفرانس دێ دو رۆژان یێ‌ بەردەوام بیت و هەر پەنەلەكی هەتا چار ڤەكۆلەران تێدا د پشكدارن، و 30 ڤەكۆلین دێ تێدا هێنە گەنگەشەكرن.
رێڤەبەرێ سەنتەرێ ڤەكۆلینێن جینۆسایدێ ل زانكۆیا دهۆك د. سالم جاسم گۆت پتریا ڤەكۆلینێن ڤی كۆنفرانسی ل دۆر وان قركرن و كۆمكوژیانە یێن ب سەرێ كوردان هاتین وەكو ئەنفال و هەلەبجە و بارزانی و ئێزدیان و ئەڤە هەمی دبنە تەوەر.