كولیژا یاسا
روژا چارشەمبی رێکەفتی 15/3/2023 ولژێر چاڤدێریا سەروکێ زانکویا دهوک دکتور داوود ئەتروشی و دیفچوونا راگرا کولیژا یاسا پروفیسورە دکتورە ئەڤین خالد عبدالرحمن، بەشێ زانستێن سیاسی لکولیژا مە رابو برێکخستن و ئەنجامدانا مێزگەردەکێ لژێر ناڤ و نیشانێت (رەهەندێن یاسایی و رامیاری یێ پروژێ راستڤەکرنا دەستوورێ کومارا عیراقێ یێ سالا 2005، دیتنەکا ئەکادیمی وسیاسی) و ب ئامادەبوونا کەسانێن بسپور نوینەرێن ئەحزابێن سیاسی وکەسانێن میدیاکار ئەڤ بابەتە ژدوو لایانڤە هاتە گەنگەشەکرن. لایەنێ دستوورى کو هاتە پێشکێشکرن ژلایێ دکتور رێنجبەر جەمیل شێخو (بریاردەرێ بەشێ زانستێن سیاسی)، و لایەنی سیاسی هاتە پێشکێشکرن ژلایێ بەرێز عەلی عەونی (ئەندامێ کومیتەیا ناڤەندی یا پارتی دیموکراتی کوردستان و بەرپرسێ لقا ئێک). پشتی بدوماهیک هاتنا پێشکێشکرنا بابەتان، سەروکێ ڤێ رینشتنێ دکتور نجم الدین محی الدین (سەروک بەشێ زانستێن سیاسی) دەرگەهێ گەنگەشێ ڤەکر بەرامبەر ئامادەبووان ڤە و گەنگەشەکا بەرهەمدار لسەر بابەتی هاتە کرن.
ژ گرنگترین دەرئەنجامێن ڤێ چالاکیێ ئەڤین لخوارێ نە:
- دبیت راستڤەکرنا دەستوورێ عیراقێ دبەرژەوەندیا هەرێما کوردستانێ دا نەبیت.
- ئەگەر دەستوور هاتە راستڤەکرن، یا گرنگە ئەڤ راستڤەکرنە ئاماژەی بدەتە مافێ هەرێما کوردستانێ د سەربەخوبونێ دا.
- پێتڤیە لسەر هەمی ئەحزابێن سیاسی یێن کوردی دهەڤگرتی بن و ئێک دیتن هەبیتن د سەرەدەریکرنێ دگەل حکومەتا ناڤەندی ل بەغدا.
- پێتڤیە لسەر هەمی ئەحزابێن سیاسی یێن کوردی داکوکیێ لسەر جێبەجێکرنا مادا 140 بدەن ژ دەستوورێ عیراقێ.
- پێتڤیە لسەر هەرێما کوردستانێ نەهێلیت ئەو ماددە بهێنە راستڤەکرن یێن کو مافێن هەرێما کوردستانێ بخوڤە دگریت.