كولیژا یاسا

کلینیکا یاسایى

پێکدهێت ژ بەرنامەیەکێ فێرکارى وپشتگیریا شیانێن زانستى یە دبوارێ پێشکێشکرنا هاریکاریا یاسایى بۆ تەخێن لاواز ژ جڤاکى وەکى (کەسانێن کێم داهات، ژنێن بەرداى، سنێلەیان) وچێکرنا هەستێ کارکرنا خوبەخشانە بۆ خزمەت کرنا جڤاکى لدەف قوتابیان.

کلینیکا یاسایى هاتیە دامەزراندن بشێوەیێ خو یێ نها برێککەفتن دگەل بەرنامێ (دادى لبەر دەستێن هەمى کەسان) کو ژلایێ ئاژانسا ئەمریکی یا پێشئێخستنێ پشت بەستن ب رێککەفتنناما ژمارە 106-2014-04 رێکەفتى 25/6/2014 دناڤبەرا کولیژا یاسا وزانستێن رامیارى وبەرنامێ ناڤهاتى، وماوێ رێککەفتنێ (11) یازدە هەیڤن ودەست پێ دکەت ژ 1/6/2014 تا 31/5/2015. وپشتى کارپێکرنێ برێککەفتنا ناڤبرى رێزدار راگرێ کولیژێ داخوازیەک پێشکێشى سەروکاتیا زانکویێ کر بمەرەما داهێنانا یەکەیەکا یاسایى بناڤێ (کلینیکا یاسایى) دا ببیتە ئێک ژ یەکەیێن کارگێرى سەر ب کولیژێ ڤە، وپشتى بلندکرنا داخوازیا راگرێ کولیژێ بۆ وەزارەتا خواندنا بلند ژلایێ سەروکاتیا زانکویێ ڤە، وەزارەتا ناڤبرى بنڤیسارا خو یا ژمارە 1804712 ل 17/9/2014 بریارا داهێنانا کلینیکا یاسایى دا وەک یەکەیەکا سەر ب کولیژێ ڤە.

سەبارەت خزمەتێن کلینیک پێشکێش دکەت پێکدهێن ژ:

ئێکەم: نوێنەرایەتیا یاسایى ل دادگەهان وئەنجامدانا هەمى پێرابوونێن یاسایى پشتى دانا بریکارنامێ بۆ پارێزەرێ کلینیکێ، وئەڤ نوێنەرایەتى یە تەخێن لاواز وکەسانێن کێم داهات.

دووەم: پێشکێشکرنا شیرەتێن یاسایى بۆ هەر کەسێ سەرەدانا کلینیکێ بکەت، ودیارکرنا پێرابوونێن یاسایى یێن کار پێ دهێتەکرن ل دادگەهان.

سێ یەم: ئەنجامدانا هەوێن هشیارکرنێ برێکا ئەنجامدانا سیمینار وپێشکێشکرنا بەرنامەیان برێکا دەزگایێن راگەهاندنێ، وەکى: رادیو وتەلەڤزیون وبەلاڤکرنا ریکلاما برێکا روژنامەیا.

چارەم: مەشقدانا قوتابیێن کولیژا یاسا ل سەر پێرابوونێن یاسایى یێن کار پێ دهێتەکرن ل دادگەهان، وپروگرامێ مەشقدانێ بشێوێ لخارێ دیارکرى یە:

1- پرگرامێ تیورى: پێکدهێت ژ پێشکێشکرنا وانەیان بۆ قوتابیێن کولیژێ (قوناغا چارێ) کو سالێ (15) پازدە وانە دهێنە پێشکێشکرن بۆ دیارکرن ورونکرنا پروگرام وکارێ کلینیکێ.

2- هەروەسا سالانە (25) بیست وپێنج قوتابیێن قوناغا چارێ ل سەر دەستێ پارێزەرێ کلینیکێ دهێنە مەشقدان برێکا پێشکێشکرنا وانەیان وپێشاندانا وان دوسییەیێن دگەهنە کلینیکێ وگەنگەشەکرنا وان دگەل قوتابیا وپێشکێشکرنا چارەیا.

3- برنا قوتابیا بۆ دادگەهێ بمەرەما ژ نێزیک زانینا پێرابوونێن کار پێ دهێتەکرن بشێوەیێ کارە ل دادگەهێ وچاوانیا دادگەهکرنێ.

پشتى بدوماهیک هاتنا ماوەیێ هەڤبەستا مورکرى دگەل بەرنامێ (دادى لبەر دەستێن هەمى کەسان)، کلینیکێ بەردەوامى دا کار وچالاکی وناما خو سەرەراى قەیرانا دارایى وشیانێن سادە یێن کولیژێ وەک یەکەیەکا سەربخو ژ یەکەیێن کولیژێ. وژمارا شیرەتێن یاسایى یێن کلینیکێ پێشکێشکرین دماوێ 1/6/2015 تا 31/9/2015 دا گەهشتە (10) دەه شیرەتا، وژمارا نوێنەرایەتیێن یاسایى بۆ هەمان ماوە (9) نەه نوێنەرایەتى بوون، سەرەراى وێ چەندێ کو ئەڤ ماوەیە دکەفتە د بێهن ڤەدانا هاڤینى یا زانکویێ دا.

ولدوماهیێ فەرە بێژین کو رژدیا راگرێ کولیژێ وپشتەڤانیا سەروکێ زانکویێ ئەگەرێن سەرەکى بوون بۆ سەرکەفتنا کلینیکێ.