قونسلێ گشتیێ ئەمریکا بەرهەڤیا خۆ بۆ پشتەڤانیێن زێدەتر بۆ پرۆژێن زانکۆیا دهۆک دیارکر.
Sept. 9, 2021, 1:26 a.m.

د ئێكه‌م سه‌ره‌دانا خۆ دا بۆ پارێزگه‌ها دهۆكێ، ل رۆژا 8/9/2021ێ، قونسلێ گشتییێ ویلایه‌تێن ئێكگرتییێن ئه‌مریكی ل كوردستانێ، Robert Palladino، و دگه‌ل دا، به‌رپرسا ئوفیسا كاروبارێن گشتی Gina Cabrera، سه‌ره‌دانا زانكۆیا دهۆك كر و ژلایێ سه‌رۆكێ زانكۆیێ، د. داود سلێمان ئه‌تروشی ڤە، هاتنە پێشوازیکرن.

د روینشتنەکێ دا، باس ل زانكۆیا دهۆك و ره‌وشا وێ و هه‌ڤركی و ئاسته‌نگێن دكه‌ڤنه‌ پێشیا وێ، ب تایبه‌تی قه‌یرانا دارایی، هاتەکرن و دیسان باس ل چالاكیێن زانكۆیێ، یێن ب پشته‌ڤانیا بالیۆزخانه‌ و قونسلخانەیێن ئه‌مریكی دهێنە ئەنجامدان، هاتەکرن.

سه‌رۆكێ زانكۆیێ دیاركر كو ب ده‌هان پرۆژێن سه‌ركه‌ڤتی ب پشتەڤانیا وان و ب هه‌ڤكاری دگه‌ل زانكۆ و سازیێن ئه‌كادیمیێن ئه‌مریكی ل زانکۆیا دهۆک هاتینە ئەنجامدان و نوكه ‌ژی سێ پرۆژێن گرنگ‌، کو ب پشته‌ڤانیا ئه‌مریكا كار لسه‌ر دهێته‌ كرن، برێڤەنە‌.

سه‌رۆكێ زانكۆیا دهۆك داخوازا به‌رده‌وامیا ڤان په‌یوه‌ندیان و پشتەڤانیەکا زێدەتر بۆ پرۆژێن زانکۆیێ كر و گۆت: "ئەم گه‌له‌ك پێخۆشین کو مه‌ ئەڤ رێژا چالاكی و پرۆژەیان دگەل قونسلخانەیا ئه‌مریكی هه‌ین و دێ ڤان پەیوەندی و هەڤکاریان خورتتر لێکەین". قونسلێ ئەمریکی ژی دیاركر كو دێ به‌رده‌وامبن لسه‌ر پرۆژە و چالاکیان ب هەڤکاری دگەل زانکۆیا دهۆک.

ل دویماهیا ڤێ روینشتنێ، د. داود ئەتروشی هندەک پشنیار لدۆر پرۆژە و چالاکیێن نویتر یێن گرێدای زانکۆیا دهۆک پێشکێشی قونسلێ ئەمریکی كرن و وان ژی پشته‌ڤانیا خۆ دیارکر و هەروەسا ئاماژەدا گرنگیا بەردەوامبوونا ڤان سەرەدانان