زانكۆیا دهۆك ل دەستپێكا هەیڤا 11 دێ‌ پشكێن ناڤخۆیی بەلاڤ كەت

هاریكارێ‌ سەرۆكێ‌ زانكۆیا دهۆك بۆ كاروبارێن قوتابیان د. مێڤان عارف دیاركر ژ بەر رەوشا نوكە یا ساخلەمیێ‌ و ب رێككەفتن دگەل هەردوو زانكۆیێن سەلاحەددین و سلێمانی تا 1/11/2020 پشكێن ناڤخۆیی ناهێنە بەلاڤ كرن و گۆت ژی بریار هاتیە دان وانێن پراكتیكی بێنە پاشخستن بۆ پشتی 1/11 و بتنێ وانێن تیوری بێنە گۆتن ب رێكا ئۆنلاین.
د. مێڤان عارف هەروەسا گۆت ل 1/11 دێ‌ پشكێن ناڤخویی هێنە بەلاڤ كرن بۆ وان قوتابیێن وانێن پراكتیكی هەین دناڤ كەمپێ‌ زانكۆیێ‌ دا داكو بشێن خاندنا خۆ ل تاقیگەه و پشكێن خۆ یێن زانستی ب دروستی ب رێڤە ببەن، هەروەسا هەتا وی دەمی داپتر د شیان دا بیت پشكێن ناڤخۆیی ژی بهێنە بەرهەڤ كرن و باشترین ئاڤاهیی بۆ بهێنە دابین كرن، هەروەسا گۆت ژ نوكە هەتا هەیڤا 11 قوتابی دێ‌ وانێن تیۆری وەرگرن ل دویف راسپاردا سەرۆكێ‌ زانكۆیا دهۆك كو رێككەفتن دگەل هەردوو زانكۆیێن سەلاحەدین سلێمانی ژی كریە ل دۆر ڤی بابەتی.
هاریكارێ‌ سەرۆكێ‌ زانكۆیا دهۆك بۆ كاروبارێن قوتابیان هەروەسا ئاشكرا كر كو ئەو ئاڤاهیێن ئەڤ سالە بۆ پشكێن ناڤخۆیی دهێنە گرتن دڤێن ئاڤاهیێن رائێخستی بن ژلایێ‌ كەلوپەلان ڤە ژبەر بابەتێن مەزاختنێ‌ و دابین كرنا پێدڤیێن قوتابیان، هەروەسا گۆت بۆ تاقیكرنان ژی ل دویف پیڤەرێن وەزارەتێ‌ دێ‌ پشك هێنە دابین كرن كو هەتا رێنما دگەهن كا بۆ سالا نوی یا خاندنێ‌ دێ‌ بەلاڤكرنا ڤان پشكا ب چ شێوە بیت، چونكو ژ بەر ڤایرۆسێ‌ كورونا كو پێشتر هندەك ژوورا هەتا چار قوتابیان دكرنە دئێك ژوور ڤە بەلێ‌ نوكە دبیت هەر دوو قوتابی بتنێ‌ بچنە د ئێك ژوور ڤە و ئەڤ رێنمایە دێ‌ ڤێ‌ هەیڤێ‌ گەهن و ل سەر بنیاتێ‌ وان رێنمایان پشك دێ‌ هێنە بەلاڤ كرن.