قونصلێ ئه‌لمانیا ل هه‌ولێر سه‌ره‌دانا زانكۆیا دهۆك كر
Oct. 10, 2020, 4:32 p.m.

ب مەرەما ژ نێزیک ئاگەهداربوون ل سەر رەوشا پەیمانگەها چارەسەریێن دەرونی و تراوما ل زانکۆیا دهۆک ئەڤرۆ رۆژا 7/10/2020 (سڤێن کراوسپێ) قۆنسلێ گشتی یێ وەلاتێ ئەلمانیا ل هەرێما کوردستانێ سەرەدانا زانكۆیا دهۆك کر
پ.د. مسلح دهۆکی، سەرۆکێ زانکۆیا دهۆک گۆت " مە داخۆاز ژ قۆنسلێ گشتی یێ وەلاتێ ئەلمانیا کر کو ئاسانکاریێن زێدەتر بۆ مە بکەت ب مەرەما وێ چەندێ زانکۆیا دهۆک بشێت پتر پەیوەندیان دگەل زانکۆ و پەیمانگەهێن وەلاتێ ئەلمانیا گرێدەت".
سەرۆکێ زانکۆیا دهۆک دیارکر" بەری نوکە ئەو کەسێن پێدڤی ب چارەسەریا دەرونی دبوون بۆ ژ دەرڤەی وەلاتی دهاتنە رەوانەکرن و ئاریشە ژ ڤێ چەندێ پەیدادبوون، چونکو هندەک کەس دەمێ دهاتنە رەوانەکرن ڤەنەدگەڕیان و سەرەرایی ڤێ چەندێ پارەکێ مەزن ژی لێ دهاتە مەزاختن، بەلێ نوکە پەیمانگەها چارەسەریێن دەرونی و تراوما ل زانکۆیا دهۆک چارەسەریا وان نەخۆشان دکەت یێن کو تووشی ئاریشێن دەرونی بووین چ ل سەر ئاستێ عیراقێ و هەرێما کوردستانێ ب گشتی و پارێزگەها دهۆکێ و برایێن مە یێن کوردێن ئێزدی یێن ژ هێرشێن دراندانە یێن تیرۆرستێن داعش رزگاربوین ".
سڤێن کراوسپێ، قۆنسلێ گشتی یێ وەلاتێ ئەلمانیا ل هەرێما کوردستانێ د پرێس کۆنفرانسەکی دا دیارکر "کو کارێ پەیمانگەها چارەسەریێن دەرونی و تراوما ل زانکۆیا دهۆک بۆ وان وەکو وەلاتێ ئەلمانیا گەلەک یێ گرنگە ژ بەر ڤێ چەندێ پشتەڤانیا پەیمانگەها ناڤهاتی دکەن".
هه‌روه‌سا قۆنسلێ گشتی یێ وەلاتێ ئەلمانیا گۆت "وەلاتێ ئەلمانیا د شەش سالێن بۆری دا هاریکاری پێشکێشی هەرێما کوردستانێ کرینە و بەهرا پتریا ڤان هاریکاریان ژی بۆ پارێزگەها دهۆکێ هاتینە تەرخانکرن، ژ بەر کو پارێزگەها دهۆکێ پتر ژ پارێزگەهێن هەولێر و سلێمانیێ ئاوارە و پەنابەر لێ هەنە و پێدڤی ب هاریکاریێ بوون".