په‌یاما سه‌رۆكێ زانكۆیێ ب هه‌لكه‌فتا ده‌ستپێكرنا ساڵا نوی یا ئه‌كادیمی (2021-2022)
Sept. 1, 2021, 6:35 p.m.

مامۆستا و قوتابیێن خۆشتڤی، فه‌رمانبه‌ر و كاربرێكه‌رێن رێزدار و هه‌می لایه‌نێن په‌یوه‌ندیدار ب كاروبارێن زانكۆیا دهۆك ڤە. ب ناڤێ زانكۆیا دهۆك و ب رێكا ڤێ په‌یامێ، پیرۆزباهیه‌كا گه‌رم ئاراسته‌ی ئێك ب ئێك ژ هه‌وه‌یێن رێزدار دكه‌م ب هه‌لكه‌فتا ده‌ستپێكرنا ساڵا نوی یا خواندنێ، ساڵا ئه‌كادیمییا (2021-2022)ێ ل رۆژا چوارشه‌مبی رێكه‌فتی 1/ 9 / 2021.

به‌روڤاژی ساڵا بۆری، ئه‌ڤ ساڵه‌ پرۆسا خواندنێ دێ دناڤ كه‌مپێن زانكۆیێ دا هێته‌ ئه‌نجامدان، ب لبه‌رچاڤ وه‌رگرتنا وێ چه‌ندێ كو‌ ره‌وشا تۆشبوونێ ب كۆرۆنایێ به‌ره‌ڤ خرابیێڤه‌ نه‌چیت. هیڤیدارم كو ئه‌ڤه‌ ببیته ئه‌گه‌رێ دلخۆشبوون و ڤەگەریانا هه‌می هیڤی و ئومێدێن قوتابیان ب دیدارا وان دگه‌ل ئێكودوو و هه‌روسا دگه‌ل مامۆستایێن وان. بۆ ده‌ربازكرنا ساڵه‌كا ئارام و كێم ئاریشه‌، پێدڤیه‌ هه‌موو لایه‌ن رێنمایێن ته‌ندروستی رژد وه‌ربگرن داكو خۆ و دەوروبەرێن خۆ بپارێزن.

د ڤێ ساڵا خواندنێ دا، هه‌می بزاڤ دێ هێنه‌ کرن پێخه‌مه‌ت بلندكرن و گه‌شه‌كرنا ئاستێ خواندنێ ل زانكۆیێ، ب مه‌ره‌ما پێگه‌هاندنا قوتابیان ب وی ره‌نگی كو دەمێ ژ زانكۆیێ ده‌ردچن، هه‌لگرێن زانست و مه‌عریفێ بن و خودان شیان و كارامه‌یی و كه‌سایه‌تییه‌كا بهێز و سه‌ركرده‌ بن. بۆ ڤێ مه‌ره‌مێ، پێدڤیه‌ كۆمه‌كا میكانیزمێن جۆراوجۆر ل به‌رده‌ست بن، ژ وانا ژینگه‌هه‌كا باشتر یا فێربوونێ و بكارئینانا مێتودێن نوی یێن وانه‌گۆتنێ و هه‌روه‌سا چالاككرنا رۆلێ قوتابی د پرۆسا فێربوونێ دا. ژ لایه‌كێ دیڤه‌، ئێك ژ ستراتیجیێن گرنگێن زانكۆیێ، دروستكرنا پره‌كێ یە دناڤبه‌را زانكۆیێ و پرسێن جڤاكی دا، ئانكو وه‌ك ئه‌رك، خۆ ل گرفتێن جڤاكی بكه‌ته‌‌ خودان. هه‌روه‌سا، مفا وه‌رگرتن ژ بیرۆكه‌ و ڤه‌كۆلینێن زانستی یێن مامۆستایێن زانكۆیا دهۆك بۆ خزمه‌تکرنا جڤاك وسازیێن حكۆمی، دێ ئێك ژ هه‌وڵێن گرنگێن زانكۆیا دهۆك بیت. بۆ گه‌هشتن ب هه‌ر سێ ئارمانجێن ئاماژه‌ پێ هاتینه‌ دان، رۆلێ مامۆستایێن زانكۆیێ فاكته‌رێ سه‌ره‌كیێ سه‌ركه‌فتنێ یه‌.

د ئێكه‌مین په‌یاما خو دا وه‌ك سه‌رۆكێ نوی یێ‌ زانكۆیێ پێدڤیه‌ ئاماژه‌ بكه‌م كو نه‌زاها ئه‌كادیمی، شه‌فافیه‌ت، یەکسانی، نیشتمانپه‌روه‌ری و رویبرویبوونا هه‌ر كاره‌كێ دویر ژ به‌رژه‌وه‌ندیا گشتی، دێ بو‌هایێن سه‌ره‌كیێن كاركرنا مه‌ بیت د زانكۆیێ دا.

سڵاڤ بۆ گیانێ پاكێ شه‌هیدێن كوردستانێ كو گیانێ خۆ كریه‌ قوربان پێخه‌مه‌ت ئه‌م ئه‌ڤرۆ خودان زانكۆیا دهۆك بین. هه‌روه‌سا سوپاس بو هه‌می پێشمه‌رگێن فیداكار و لایه‌نێن ئه‌منی بۆ پاراستنا ئاسایشا مه‌ و رەخساندنا كه‌شه‌كێ ئارام بۆ به‌رده‌وامیا پرۆسا خواندنێ. هیڤیدارم ساڵا ئه‌كادیمی یا نوی ساڵه‌كا به‌خته‌وه‌ر و پڕی ده‌ستكه‌فتێن زانستی و پەروەردەیی بیت.

پ.هـ.د. داود سلێمان ئه‌تروشی
سه‌رۆكێ زانكۆیا دهۆك
1/ 9 / 2021