لاپەرێن مێژویا گەلێ كورد د پرن ژ بیرەوەریێن تراژیدی و ناخ هەژین، دوژمنێن گەلێ مە هەر هوڤاتیەكا پێچێبووی یا ب دژی مە بكارئینایی، مێشكێ مروڤی تەقەبلا ڤەگێرانا هندەك ژ ڤان كریاران ناكەت، درندایەتی بگەهیتە وی رادەی زانكۆ بهێنە توپباران كرن، د رۆژەكا وەكو ئەڤرۆ دا ل سالا 1974 كو ل وی دەمی ئەم قوتابی بووین ل زانكۆیا سلێمانیێ ل باژێرێ قەلادزێ ل رۆژا 24 ی نیسانێ زانكۆیا مە ژ لایێ فرۆكێن جەنگی یێن رژێما گوربەگورا ژ ناڤچوویا بەعس ڤە هاتە توپباران كرن، و پتر ژ 150 كەسان ژ قوتابی و مامۆستا و فەرمانبەران د وێ توپباران كرنێ دا هاتنە شەهید كرن، كو د مێژویا مرۆڤایەتیێ هەمیێ دا رێز ل جهێن فێربوون و زانینێ دهێنە گرتن بەلێ بتنێ ل فەرهەنگا عەقلیەتا شوفینیزمی دا قوتابی ل هۆلێن خاندنێ ڤە دهێنە شەهید كرن.
چ جاران ب توپ و فرۆكان ئیرادا گەلێ مە ناهێتە سست كرن و ژ ناڤ برن، سوپاس بۆ خودێ ئەو هەمی ژ ناڤ چوون یێن خەون ب ژناڤچوونا گەلێ مە ڤە ددیتن، ئەم ئەڤرۆ خودان پەرلەمان و حكومەتا هەرێمێ ینە، ل جهێ كو بتنێ هنگی مە ئێك زانكۆ هەبوو، ئەڤرۆ ب دەهان زانكۆ مە یێ ل هەرێما كوردستانێ هەین و سال بۆ سالێ د وەرار و پێشڤەچوونێ دانە و گەشەپێدانێن زانستی ئاماژێن وانن.
ل بیرەوەریا شەهیدێن زانكۆیێ هزار سلاڤ ل گیانێ پاكێ وان شەهیدێن قوتابی و مامۆستا و فەرمانبەران بیت یێن ل رۆژەكا وەكو ئەڤرۆ ل 24/4 گیانێ خۆ یێ پاك گوری كوردستانێ كری، هزار سلاڤ ل گیانێ پاكێ هەر شەهید و عەگید و پێشمەرگە و قەهرەمانەكی بن یێن گیانێ خۆ كریە قوربان كو ئەڤرۆ ئەم ب سەرفەرازی بژین، ئەڤرۆ ئەم سەربلندی بژین، هزار سلاڤ ل تەڤایا شەهیدێن كورد و كوردستانێ بن، سەركێشێ وان بارزانیێ نەمر و كاك ئدریسێ هەردەم ساخ.