په‌یڤا سه‌رۆكێ زانكۆیا دهۆك (ب هه‌لكه‌فتا 18 ى شوباتێ)

ب هه‌لكه‌فتا ده‌ربازبوونا 68 سالان ب سه‌ر خه‌باتا رێكخراوه‌ى یا ئێكه‌تیا قوتابیێن كوردستانێ ئه‌وا ل 18 ى شوباتا سالا 1953 ب بریارا راسته‌وخۆ یا بارزانیێ نه‌مر ل وى ده‌مى هاتیه‌ دامه‌زراندن، ئه‌م ب ناڤێ سه‌رۆكاتیا زانكۆیا دهۆك ڤێ رۆژێ لێ پیرۆز دكه‌ین، رۆژا ده‌ربازكرنا 68 سالێن خزمه‌تێ و هه‌لكرنا شه‌مالكا 69 سالیێ، بۆ نویبوون و دلسوزى و هزرێن نه‌گور و به‌ره‌ڤانى كرن ژ سمبولێن نه‌ته‌وه‌ى و وه‌لاتینیێ.
ئێكه‌تیا قوتابیێن كوردستانێ ئێكه‌مین قوتابخانا كوردایه‌تیێ و هزرا نه‌ته‌وه‌ى و نشتیمان په‌روه‌ریێ بوو ل ناڤ ناڤه‌ندێن خواندنێ هاتیه‌ دامه‌زراندن، ژێده‌رێ ڤان بیروباوه‌ران ژى بیروباوه‌ر و فه‌لسه‌فا نه‌ته‌وه‌ى و نشتیمان په‌روه‌ریا بارزانیێ نه‌مر بوویه‌، چونكو هه‌رده‌م ب باوه‌ریه‌كا مكوم خه‌بات ژ پێناڤى كوردستانێ و ئاخا وێ یا پیرۆز كریه‌ و هه‌ر و ب وێ باوه‌ریێ ئه‌ڤ ئێكه‌تیه‌ دامه‌زراندیه‌ و هه‌رده‌م پشته‌ڤانێ ته‌خا قوتابیان بوویه‌ و قوتابى ب (سه‌رێ رمێ) وه‌سف كرینه‌.
قوتابى ب رێكا ئێكه‌تیا قوتابیان و ب هزرێن خۆ یێن نه‌ته‌وه‌ى و نشتیمان په‌روه‌رى پشته‌ڤان و هه‌ڤچه‌په‌رێن پێشمه‌رگه‌ى نه‌ ب زانست و زانینا خۆ، چونكو پێشمه‌رگێ قاره‌مان حنێر و هه‌یبه‌تا خۆ نیشادایه‌ و دوپات كریه‌ كو ئه‌و هێزه‌ یا بشێت به‌ره‌ڤانیێ ژ ده‌ستكه‌فتێن ڤێ هه‌رێمێ بكه‌ت.
رێكخراوه‌كا 68 سالان خزمه‌ت هه‌بیت بێ گومان ئه‌ڤ خه‌باتا دیر و درێژ یا بێ شه‌هید و قوربانى دان نابیت، ژبه‌ر ڤێ چه‌ندێ یا پێدڤیه‌ ل ڤان هه‌لكه‌فتان بیرا خۆ ل وان خۆشمێر و قاره‌مانان ژى بینین یێن ئالا هه‌لگرێن نشتیمانى و پارێزڤانێن ئاخا پیروزا كوردستانێ و رێزێ ل قوربانى دانا وان بگرین.
هزار سلاڤ ل گیانێ شه‌هیدێن قوتابى و پێشمه‌رگه‌ و هه‌مى شه‌هیدێن كوردستانێ و سه‌ر كاروانێ وان بارزانیێ نه‌مر و كاك ئدریسێ هه‌رده‌م ساخ بن.

پرۆفیسور دكتۆر مصلح دهۆكى
سه‌رۆكێ زانكۆیا دهۆك