بەرێ‌ بناغەی بۆ پرۆژێ‌ كارگەها بەرهەمئینانا پتاتان هاتە دانان

ل رۆژا 17/6/2021 ب ئامادەبوونا سەرۆكێ‌ حكومەتا هەرێما كوردستانێ‌ مەسرور بارزانی، بەرێ‌ بناغەیی یێ‌ پرۆژێ‌ كارگەها جوتیار بۆ بەرهەمێن پتاتان ل ناحیا روڤیا هاتە دانان.
د رێورەسمان دا سەرۆكێ‌ زانكۆیا دهۆك پ. د. مصلح دهۆكی ژی یێ‌ بەرهەڤ بوو چونكو ئەڤ پرۆژە ب هەماهەنگی و هەڤكاریا زانكۆیا دهۆك و ریڤەبەریا گشتی یا چاندنێ ل پارێزگەها دهوكێ و كۆمپانیا KH و كۆمپانیا HZPC و رێكخراوا CABI ب پشتەڤانیا حكومەتا هولەندی دێ‌ دەست ب كار بیت، كو پێشتر د. روفایٔیل شلیمون توما رێكخەرێ‌ زانكۆیا دهۆك دڤی پرۆژەی دا دیاركربوو كو ل عیراقێ پتر ژ 40 پرۆژان هاتنە پێشكێش كرن بۆ وەلاتێ هولەندا ئەڤ پرۆژە بتنێ هاتیە وەرگرتن كو بوو ماوێ پێنج سالان دی یێ بەردەوام بیت و نێزیكی 10 هزار جوتیار دێ ژێ‌ مفاداربن و هەروەسا دێ مفایی گەهینیتە قوتابی و مامۆستایێن زانكۆیی ژلایێ پراكتیكی ڤە.
فەرمانگەها میدیا و زانیاریان یا حكومەتا هەرێما كوردستانێ‌ راگەهاند كو ئەڤ پرۆژە دێ‌ ژلایێ‌ رێكخراوا كوردستان هولەندا KH ڤە و ب پشتەڤانیا حكومەتا هەرێما كوردستانێ‌، و ب كۆژمێ‌ نێزیكی 10 ملیون دولاران هێتە بجهئینان.
ئەڤ پرۆژە ئێكە ژ پرۆژێن گرنگ و ستراتیژی یێن ئابووری، كو دێ‌ یێ‌ هاریكار بیت ل دابینكرنا ئاسایشا خارنێ‌ ل هەرێما كوردستانێ‌ و پشتەڤانیەكە بۆ جوتیاران ژی كو بەردەوامیێ‌ بدەنە بەرهەمێ‌ خۆ یێ‌ چاندنێ‌.