بەری ٦٠ سالان و د رۆژەکا وەکو ئەڤرۆ دا، شۆرەشا مەزنا ئەیلوولێ، ب رێبەریا سەرکردێ کارێزمایێ نەتەوا کورد، مەلا مستەفا بارزانی، دەستپێکر. درێژترین و کاریگەرترین شۆرەش د دیرۆکا هەڤچەرخا کوردی دا دھێتە نیاسین. ڤێ شورەشێ تایبەتمەندیێن مەزن هەبوون، ئێک ژ وان تایبەتمەندیان، شۆرەشەکا سەرتاسەری بوو و هەمی پێکهاتەیێن کوردستانێ ب خۆ ڤە گرتبوون. شۆرەشەکا دویر بوو ژ سیاسەتا ناوچەگەریێ، ل زاخۆ تاکو خانەقین ڤەگرتبوو و ل ژێر سەرکردایەتیا ئێکگرتی دھاتە برێڤەبرن. هەروەسا ئارمانجێن ڤێ شۆرەشا مەزن زەلال بوون و گۆتارا وێ یا سیاسی یا ئاشکرا و دەستنیشانکری بوو. لەورا ژی، مەزنترین شۆرەش بوو د دیرۆکا هەڤچەرخا کوردی دا و تا نوکە ژی ئەم یێ بەرهەمێ کەدا سەرکردە و خەباتکەر و قوربانیدەر و شەهیدێن نەمرێن ڤێ شۆرەشا پیرۆز دخۆین.
پەیاما ڤێ شۆرەشا مەزن ئەو بوویە کو گەلەکێ دێرین و خودانێ رەسەنێ ڤێ خاکێ هەیە ب ناڤێ گەلێ کورد، کو تووشی ستەمکاریێ بوویە و خاکا وی هاتیە داگیرکرن و ژیان و ژیار و دەروونێ تاکێ ڤی گەلی تووشی هەمی جۆرێن چەوساندن و تەپەسەرکرن و تیرۆرێ بووینە. پەیاما شۆرەشێ یا ئاراستەکری بۆ، ب تایبەت بۆ وەلاتێن زڵهێز و وەلاتێن دەردۆر کو تا ئەڤ گەلە نەگەهیتە مافێن خۆ یێن رەوا، دەستان ژ خەباتێ بەرنادەن.
هەژی گوتنێ یە، چەوا بەرگیری و کۆلنەدان و چەک، هێزن بۆ پاراستنا ڤی گەلێ دێرین و رەسەن، ب هەمان شێوە و ب تایبەتی د کەتوارێ نوکە یێ هەرێما کوردستانێ دا، زانین هێزەکا خودان کاریگەریەکا مەزنە بۆ پاراستن و پێشڤەبرنا هەرێما کوردستانێ. لەورا پێدڤیە هەر ئێک ژ مە، د ڤان سەنتەرێن ئەکادیمی دا و لدویڤ سرۆشتێ ئەرکێ خۆ، وەکو خەباتکەرەک، وەکو پێشمەرگەیەک، ب پاقژی و دەستپاکی و زەلالی و خۆڕاگری کاربکەین، داکو بەردەوامیێ بدەینە بجهئینانا ئارمانجێن شۆرەشا پیرۆزا ئەیلوولێ.
ل دویماهییێ، پیرۆزە یادا ٦٠ سالیا شۆرەشا مەزنا ئەیلوولێ، سەرێ خۆ ب رێز ڤە بۆ شەهیدێن ڤێ شۆرەشا مەزن دچەمینین، و سەرکێشێ وان بارزانیێ نەمر و ئدریسێ هەردەم ساخ.
پ. ھ. د. داود سلیمان ئەتروشی
سەرۆکێ زانکۆیێ
٢٠٢١/٩/١١