جڤاتا وەزارەتا خاندنا بلند ل زانكۆیا دهۆك كۆمبوو
أغسطس 11, 2021, 11:05 م

 

جڤاتا وەزارەتا خاندنا بلند ل هەرێما كوردستانێ‌ ل رۆژا 7/6/2021 ل سەنتەرێ‌ رەوشەنبیری و جڤاكی یێ‌ زانكۆیا دهۆك كۆمبوونا خۆیا ئاسایی یا پێنجێ‌ ل دۆر چەند بابەتێن گرێدایی خاندنا بلند ئەنجام دا.
ل دۆر ڤێ‌ كۆمبوونێ‌ سەرۆكێ‌ زانكۆیا دهۆك پ. د. مصلح دهۆكی دیاركر كو ئەڤ كۆمبوونە درێژەپێدەرا كۆمبوونێن پێشترە یێن وەزارەتا خاندنا بلند و گۆت هەر جار ئەڤ كۆمبوونە ل زانكۆیەكی بهێنە كرن دێ‌ گرنگیا خۆ هەبیت ژلایێ‌ پتر ئاشنابوونێ‌ ل دۆر ئاستێ‌ ئەكادیمی یێ‌ هەر زانكۆیەكی و پەیوەندیێن وێ‌ یێن زانستی.
وەزیرێ‌ خاندنا بلند و ڤەكۆلینێن زانستی ل حكومەتا هەرێما كوردستانێ‌ د. ئارام محمد قادر بەحسێ‌ گرنگیا خاندنا پیشەیی و تەكنیكی ل هەرێما كوردستانێ‌ كر و راگەهاند كو خاندنا پیشەیی و تەكنیكی ئێكە ژ كارێن هەرە گرنگێن حكومەتا هەرێما كوردستانێ‌ چونكو ئەڤ خاندنە یا تایبەت نینە ب هەرێما كوردستانێ‌ ڤە بەلكو بابەتەكێ‌ نێڤدەولەتیە و وەلات بۆ پێشخستنا بارێ‌ خۆ یێ‌ ئابووری گرنگیەكا زۆر پێ‌ ددەن، لەورا زانكۆیێن پۆلیتەكنیك و خاندنێن تەكنیكی و پیشەیی دڤێت وی رۆلی ببینن و كادرێ‌ ناڤەندی درست بكەن و پێدڤیێن بازارێ‌ كاری ل كوردستانێ‌ دەستەبەر بكەن و قوتابیێن خودان شیان بۆ بازاری پێ‌ بگەهینن.


د پشكەكا دی یا كۆمبوونێ‌ دا و ب مەبەستا هاندان و پالپشتی كرنا سێ‌ یێن ئێكێ‌ یێن زانكۆیێن حكومی یێن كوردستانێ‌ ئەوێن هەتا نوكە نەهاتینە دامەزراندن ل زانكۆیان، جڤاتا وەزارەتا خاندنا بلند بریار دا كو ئەو سێ‌ یێن ئێكێ‌ ئەوێن ل خاندنا بلند/ ماستەرێ‌ بۆ سالا خاندنێ‌ 2019-2020 ل زانكۆیێن كوردستانێ‌ هاتینە وەرگرتن ب شێوازێ‌ پارالێل، یێن ئێكێ‌ ب رێژا 75% و یێن دووێ‌ ب رێژا 50% و یێن سیێ‌ ژی ب رێژا 30% ژ كریا خاندنێ‌ بۆ سالا دووێ‌ دێ‌ بۆ هێتە داشكاندن.
جڤاتا وەزارەتا خاندنا بلند هەروەسا بریار دا ب ڤەكرنا ماستەرا پیشەیی (MBA) و دكتۆرایا پیشەیی ((DBA) و هەروەسا ڤەكرنا سەنتەرێ‌ خاندنا پیشەیی یا ئێك سال بۆ دەرچوویێن خاندنا ئامادەیێن زانستی و وێژەیی و پەیمانگەهێن پێنج سالی ل زانكۆیێن پولیتەكنیكی یێن هەرێما كوردستانێ‌.
ل دووماهیا كۆمبوونێ‌ ژی هەر ئێك ژ ئەندامێن جڤاتێ‌ چەند بۆچوون بۆ چارەسەركرنا كێشە و گرفت و هەلسەنگاندنا خۆ بۆ رەوشا نوكە یا زانكۆیان بەرچاڤ كرن.