ل رۆژا 15/11/2021 ل ناڤەندا قوتابیان ل زانكۆیا دهۆك ئاهەنگا دەرچوونا گەرا دووێ یا قوتابیێن ماستەرێ ژ پەیمانگەها چارەسەریا دەروونی و تراومایێ هاتە گێران، كو 21 قوتابی دڤێ گەرێ دا بوونە هەلگرێن باوەرناما ماستەرێ ب چارەسەریا دەروونی و تراومایێ.
د رێورەسمێن دەرچوونێ دا سەرۆكێ زانكۆیا دهۆك، د. داود سلیمان ئەتروشی، د پەیڤەكی دا ئاماژە دا وێ چەندێ كو د شانازن بۆ دەرچوونا گەرەكا نوی یا دەرچوونا بسپۆرێن چارەسەریا دەروونی و تراومایێ، بۆ خزمەتكرنا خەلكێ پێدڤی ل ڤێ دەڤەرێ، وەكو دهێتە زانین دەڤەرا مە تووشی گەلەك نەخۆشیان بوویە، و بووینە هوكار كو خەلكێ مە كارتێكرن لێبوویە، و بەری ڤەكرنا ڤێ پەیمانگەهێ شیانێن پێشكێش كرنا خزمەتێن پێدڤی نەبوون كو ژلایێ دەروونی ڤە خزمەتا وان بهێتە كرن.
سەرۆكێ زانكۆیا دهۆك بەحسێ وێ چەندێ ژی كر كو ئێك ژ كارێن زانكۆیێ پێشكێش كرنا خزمەتایە بۆ جڤاكی بگشتی و ڤەكرنا ڤێ پەیمانگەهێ ژی ئێك ژ وان خزمەتا یە یێن زانكۆ پێشكێشی جڤاكی دكەت، هەروەسا زانكۆیا دهۆك كلینیكا چارەسەریا دەروونی ڤەكریە، و دەرچوویێن ڤێ پەیمانگەهێ دێ ل ڤێ كلینیكێ خزمەتێ پێشكێشی نەخۆشێن دەروونی كەن.
ل دویف دا هاریكارێ راگرێ پەیمانگەهێ، د. ئیلهان كزلهان، و هەروەسا هاریكارێ راگری، د. مەمو فەرحان، د پەیڤێن خۆدا ئاماژە دا گرنگیا هەبوونا ڤێ پەیمانگەهێ بۆ جڤاكی بگشتی و ئەوكەسێن تووشی كێشێن دەروونی بووین ب تایبەتی، قونسلێ گشتی یێ وەلاتێ ئەلمانیا ل هەرێما كوردستانێ، كلمنس زمتنر، كو ل ڤان رێورەسمان یێ بەرهەڤ بوو، پەسنا ڤی جۆرێ خاندنێ كر و پشتەڤانیا خۆژی بۆ سەركەفتنا ڤێ پەیمانگەهێ دووپاتكر.
پەیمانگەها چارەسەریا دەروونی و چارەسەریا تراومایێ ل سالا 2017 ل زانكۆیا دهۆك و ب هەڤكاری ل گەل زانكۆیا (تـوبیگـن) ل ویلایەتا (بادن ڤـورتـمبێرگ) یا ئەلمانی ل زانكۆیا دهۆك هاتیە ڤەكرن، بۆ جارا ئێكێ بوو پەیمانگەهەكا ژ ڤی رەنگی ل كوردستانێ و عیراقێ دهێتە دامەزراندن، پرۆگرامێ خاندنا ماستەرێ ل ڤێ پەیمانگەهێ سێ سالن، سالا ئیكێ ئامادەكاری نە، و سالێن دووێ و سیێ بسپۆریێ دخوینن و پشتی قوتابی دەردچیت باوەرناما ماستەرێ ب چارەسەریا دەروونی و چارەسەریا تراومایێ وەردگریت.