ب ئامادەبوونا د. داود ئەتروشی سەرۆكێ زانكۆیا دھۆك و ماجد سەید سالح جێگرێ پارێزگارێ دھۆكێ و قايمقامێ قەزا دهۆک و هندەک كەسایەتیێن فەرمی و رێڤەبەرێن سازیێن حكومی و مامۆستا و قوتابی و ستافێ كارگێریێ زانكۆیا دھۆك، رۆژا دیزاینا ئەندازیاری ژ لایێ قوتابیێن کولیژا ئەندازیاری ل زانکۆیا دهۆك، رێكەڤتی 15ـی گولانێ 2023 ل ناڤەندا قوتابیان ھاتە ساخكرن، د پیشانگەھەکێ دا پرۆژێن دەرچوونێ یێن قوتابیێن کولیژا ئەندازیاری یێن پشكێن تەلارسازی، شارستانی، كارەبا و كۆمبیوتەر، بایۆمێدیكال، ژێدەرێن ئاڤێ، رۆپیڤان و میكانیك، ھاتنە نیشاندان.
كولیژا ئەندازیاری سالانە ب ساخكرنا رۆژا دیزاینا رادبیت، د ڤێ رۆژێدا قوتابیێن قوناغێن چوارێ و پێنجێ یێن پشكێن كولیژێ پرۆژێن خۆ یێن دەرچوونێ چ جودا یان ب ھەڤپشكی نیشان ددەن پشكا تەلارسازی ب 25 پرۆژا پشكدار بوون كو ھەر پرۆژەك قوتابیەكی ڤە ب شێوەیەكێ جودا ھاتبوونە بەرھەڤكرن، پشكا كارەبا پشكداری ب 10 پرۆژا كر، كو ژلایێ 35 قوتابیان ڤە ھاتبوونە بەرھەڤكرن، پشكا میكانیك پشكداری ب 6 پرۆژا كر، كو ژلایێ 23 قوتابیا ڤە ھاتبوونە بەرھەڤكرن، ھەروەسا 6 پرۆژە ژلایێ قوتابیێن پشكا بایۆمیدیكال ڤە ھاتبوونە بەرھەڤكرن، قوتابیێن پشكا شارستانی ژی كو ھژمارا وان 95 قوتابی بوون 18 پرۆژە بەرھەڤكرن، پشكا ژێدەرێن ئاڤێ 13 پرۆژە ژلایێ 65 قوتابیا ڤە بەرھەڤكربوون. دیسان پشكا رۆپیڤان 8 پرۆژە ژلایێ 42 قوتابیا ڤە بەرھەڤكربوون.
زێدەباری پرۆژێن دەرچوونێ ھندەك پرۆژێن بچویك یێن دیزاینێن ئەندازیاری ژلایێ قوتابیێن قوناغا دووێ ژ ھەمی پشكێن كولیژێ ھاتبوونە بەرھەڤكرن، د ھەمان رۆژدا بەریكانا "Popsicle Stick Bridge" یا پێنجێ ھاتە ئەنجامدان، كو كولیژا ئەندازیاری سالانە ئەنجام ددەت و 125 قوتابیان پشكداری د ڤێ بەریكانێ دا كر، كو ب سەر 20 گرۆپان ھاتبوونە دابەشكرن و ھەر گرۆپەكی ب پرۆژەیەكێ دیزاینێ پشكداری كر، ئەڤ پێنگاڤە ژی بۆ پەرەپێدانا كارێ ب ھەڤرا ھاتیە ئەنجامدان. بۆ سەركەڤتنێ د ڤێ بەریكانێ دا چەند پیڤەرێن ئەندازیاری ھاتبوونە دانان ئەوژی (كارایی، جوانكاری، پێشبینی) بوون، ل دویماھیا بەریكانێ ژ ھەر پشكەكا كولیژێ پرۆژەیەك وەك باشترین پرۆژە ھاتە ھەلبژارتن و قوتابیێن پشكدار د دیزاینكرنا وی دا ژلایێ لیژنا رێكخەرا بەریكانێ ھاتنە خەلاتكرن.
راگەهاندنا زانکۆیا دهۆک؛ 18ـی گولان 2023
راپۆرت: فرمێسك حەسۆ
وەرگێران: ماھر كێستەیی
فۆتۆ: محەمەد عەبدولكەریم و عەلی بانكی